فوتو: الەكساندر پەتروۆ

رەسەيلىك يممۋنوبيولوگيالىق دارىلەر وندىرەتىن «ميكروگەن» ءوندىرىس ورنىنىڭ قىزمەتكەرى الەكساندر پەتروۆ رەسەي بارلاۋ ۇيىمىنىڭ بۇرىنعى قىزمەتكەرى سەرگەي سكريپال مەن قىزىنىڭ ۋلانۋىنا ءوزىنىڭ قاتىسى بار دەگەن ايىپتاۋعا جاۋاپ بەردى. بۇل تۋرالى جاۋابىن ول رەسەيدىڭ «Russia Today» تەلەارناسىنا بەردى دەپ حابارلايدى تەلەارنانىڭ Telegram كانالى.

«مەن بۇل تۋرالى ەشتەڭە بىلمەيمىن جانە سكريپالداردىڭ باستارىنان وتكەن نارسەگە قاتىسىم جوق. ءتىپتى، مەن لوندون تۇگىلى، التايعا دا بارا المايمىن»، - دەگەن ول «ميكروگەننىڭ» تومسكدەگى فيليالى «ۆيريون» عىلىمي-وندىرىستىك بىرلىگىندەگى بولىمشەسىنىڭ باستىعى بولىپ ىستەيتىنىن دە جاسىرماعان.

ۇلىبريتانيا بيلىگى 5-قىركۇيەكتە لوندونعا جۇيكە-سال اۋرۋىن تۋدىرۋشى زاتتەكتى اكەلگەن بولۋى مۇمكىن رەسەيلىك ازاماتتار — رۋسلان بوشيروۆ پەن الەكساندر پەتروۆتىڭ ەسىمىن حابارلاعان ەدى. ولارعا سەرگەي سكريپال مەن قىزى يۋليا سكريپالدىڭ ۋلانۋىنا قاتىستارى بار دەگەن ايىپ تاققان بولاتىن. ءتۇرلى اقپارات كوزدەرىنىڭ مالىمەتىنشە، كۇدىكتى ەكەۋدىڭ تولقۇجات نومىرلەرىنىڭ تەك سوڭعى ساندارىندا عانا ايىرماشىلىق بار. ۇلىبريتانيانىڭ وسى مالىمدەمەسىنەن كەيىن-اق بوشيروۆ پەن پەتروۆتى قاماۋعا الۋ ءۇشىن ەۋروپالىق وردەر بەرىلگەن. سونىمەن قاتار، ولاردىڭ گاتۆيك اۋەجايىنداعى سۋرەتتەرى مەن لوندونداعى بەينەكامەراعا ءتۇسىپ  قالعان سۇلبالارى جاريالانعان ەدى.

بۇدان بۇرىن لوندون بيلىگى بۇۇ-نىڭ قاۋىپسىزدىك كەڭەسىن وسى وقيعاعا قاتىستى شۇعىل جيىن وتكىزۋگە شاقىرعان ەدى. وندا، ۇلىبريتانيا اتالعان وقيعاعا رەسەيدىڭ قاتىسى بارلىعىنا سەنىمدى ەكەندەرىن جاسىرماي، قىلمىستى جاساۋشى تاراپتىڭ تەز ارادا قۇرىقتالۋىن تالاپ ەتتى. الايدا، رەسمي وزىنە تاعىلعان بۇل ايىپتاۋدى ءۇزىلدى-كەسىلدى جوققا شىعارۋدا.

بارىمىزگە بەلگىلى، ۇستىمىزدەگى جىلدىڭ ناۋرىز ايىندا رەسەي بارلاۋ ۇيىمىنىڭ بۇرىنعى قىزمەتكەرى سەرگەي سكريپال مەن قىزى يۋليا سكريپال ۇلىبريتانيانىڭ سولسبەري قالاسىندا ەس-ءتۇسسىز تابىلعان ەدى. لوندون ولاردىڭ جۇيكە-سال اۋرۋىن تۋدىرۋشى قاتەرلى زاتتەكپەن ۋلاندى دەپ ەسەپتەيدى.

“The Qazaq Times”