يران ءسىم: رەسەي، يران جانە تۇركيا باسشىلارىنىڭ كەزدەسۋى — سۇرياداعى «بەيبىتشىلىككە جەتكىزەتىن قادام»

يراننىڭ سىرتقى ىستەر ءمينيسترى باحرام گاسەمي الداعى ۋاقىتتا يران، رەسەي جانە تۇركيا ەلدەرى باسشىلارىنىڭ قاتىسۋىمەن وتەتىن ءسۇريا ماسەلەسى بويىنشا ءۇش جاقتى سامميت وسى ەلدەگى «قاۋىپسىزدىك، تۇراقتىلىق جانە بەيبىتشىلىككە اپاراتىن قادام بولماق» ، - دەپ مالىمدەدى. بۇل تۋرالى  "eadaily.com" يران ءسىم-نە سىلتەمە جاساپ.

بارىمىزگە بەلگىلى، اتالعان سامميت 7 قىركۇيەكتە تەھراندا (تەگەراندا) مەملەكەت باسشىلارى مەن سىرتقى ىستەر مينيسترلەرىنىڭ قاتىسۋىمەن وتەدى دەپ كۇتىلۋدە.

«سۇرياداعى داعدارىس وسى كەزدەسۋدە تۇبەگەيلى شەشىلەدى دەپ كۇتە المايمىز. الايدا، ءبىز ءبىر ماسەلەدە، ياعني ساياسي ماسەلەدە ىمىراعا كەلۋىمىز مۇمكىن دەپ ەسەپتەيمىز»، - دەدى يراننىڭ ءسىم باحرام گاسەمي. وسى سامميتتە ءسۇريانىڭ تۇركياعا جاقىن ورنالاسقان يدليب قالاسىنىڭ سولتۇستىك-باتىسىنداعى جاعداي ءسوز بولادى دەپ كۇتىلۋدە.

ەسكە سالايىق، ءۇش ەلدىڭ باسشىلارى رەجەپ تايىپ ەردوعان، ۆلاديمير پۋتين جانە حاسان رۋحاني سۇرياداعى جەتىجىلدىق سوعىستى توقتاتۋعا قاتىستى ماسەلەنى تالقىلاۋ ءۇشىن انكارادا باس قوسقان ەدى.  وسى ەلدەر سۇرياداعى قاقتىعىستى توقتاتۋعا كەپىل بولۋعا شەشىم شىعارىپ، 2016 جىلدان باستاپ سۇريالىق قاقتىعىستى رەتتەۋ بويىنشا بەيبىت كەلىسسوزدەر وتكىزىپ كەلەدى. سونىمەن قاتار، ب.گاسەمي سۇريالىق ۇكىمەتتىڭ وتىنىشىمەن يراندىق اسكەري كەڭەسشىلەردىڭ «تەرروريزممەن كۇرەسۋ» ءۇشىن  سۇريادا ءالى دە قالاتىندىقتارىن مالىمدەدى.

“The Qazaq Times”