بوريس ەلتسين مەن بيلل كلينتون. فوتو: تاسس

اقش پرەزيدەنتى بيلل كلينتون رەسەي باسشىسى بوريس ەلتسينگە بيلىك باسىندا قالۋعا كومەكتەسكەن.

جاقىندا اقش-تىڭ ەكس باسشىسى بيلل كلينتوننىڭ پرەزيدەنت كىتاپحاناسى 1993 جانە 1999 جىلدار ارالىعىنداعى مۇراعاتىن جاريالادى. وندا 90 جىلداردىڭ باسىندا رەسەي پرەزيدەنتى بولعان بوريس ەلتسين مەن بيلل كلينتوننىڭ كەلىسسوزدەرى جازىلعان بىرنەشە ستەنوگراممالار كوپشىلىك نازارىنا ۇسىنىلعان. جاريالانعان قۇجاتتاردىڭ بىرىندە بوريس ەلتسين 1993 جىلى بيلىككە تالاس كەزىندە وزىنە قارسى شىققان رۋسلان حاسبۋلاتوۆ پەن الەكساندر رۋتسكو جاقتاستارىن قالاي باسىپ، جانشىعانىن ايتا كەلە كلينتونعا: «قازىر رەسەيدىڭ دەموكراتيا جانە نارىق جولىنا تۇسۋىنە ەشقانداي كەدەرگى جوق. بۇل ىسكە قاتىستى فاشيستىك ۇيىمداردىڭ جۇمىسىنا تىيىم سالىندى. بۇدان بىلاي ولار بىزگە كەدەرگى كەلتىرمەيدى دەپ ۇمىتتەنەمىن. قازىر ماعان باسەكەلەس بولاتىن تۇلعا جوق. مەنىڭ حالىق اراسىنداعى رەيتينگىم 90 پايىز» - دەيدى.

ءوز كەزەگىندە بيلل كلينتون بوريس ەلتسينگە: «ايماق باسشىلارىن قولداۋ رەتىندە گۋمانيتارلىق كومەك جىبەرسەم قالاي قارايسىز؟» دەگەن ۇسىنىس جاسايدى. كلينتوننىڭ بۇل ۇسىنىسىنا ەلتسين:«كومەك ارتىق ەتپەس ەدى» - دەپ جاۋاپ بەرەدى. ءسوز سوڭىندا بيلل كلينتون: «وندا اتالمىش ماسەلە بويىنشا مەنىڭ ادامدارىم سىزدەرمەن بايلانىسادى» - دەپ ءوز ءسوزىن تۇيىندەيدى.

كەلەسى ءبىر ستەنوگراممادا بوريس ەلتسين بيلل كلينتونعا: "سوڭعى ۋاقىتتارى اقش باسپاسوزىندە "كوممۋنيستەر جاقسى ادامدار. ولاردان قورقۋدىڭ قاجەتى جوق" دەگەن سارىنداعى ماتەريالدار شىعىپ جاتىر. مەن ەسكەرتەمىن، ولارعا سەنبەڭىزدەر. ولاردىڭ باسىم كوپشىلىگى - فاناتيكتەر. كەرەك بولسا ولار كەڭەستەر وداعىنىڭ قۇرامىندا بولعان رەسپۋبليكالاردىڭ شەكاراسىن بۇزىپ، قىرىمدى كەرى قايتارىپ الادى جانە الياسكاعا قاتىستى تالاپتار قويۋعا تىرىسادى" - دەيدى.

"The Qazaq Times"