جاپونيا قورعانىس مينيسترلىگى قىتايدىڭ اسكەري قاتەرىنەن الاڭداپ، دابىل قاعۋدا

جاپونيا قورعانىس مينيسترلىگى وكىلىنىڭ حابارلاۋىنشا، ءبىر جىلدان بەرى قىتايدىڭ اسكەري الەۋەتىن تەز ارادا ارتتىرۋى جانە جاپون يەلىگىندەگى سۋلاردا اسكەري ارەكەتتەرىن جيىلەتۋى، جاپونيانىڭ قورعانىسىنا ۇلكەن الاڭداۋشىلىق تۋعىزىپ كەلگەن. بۇل تۋرالى VOA جاڭالىقتار قىزمەتى حابارلاعان بولاتىن.

دۇيسەنبى كۇنى وتكەن اسكەري-تەڭىز اعا وفيتسەرلەرىنىڭ ماجىلىسىندە سويلەگەن سوزىندە قورعانىس وكىلى قىتايدىڭ جاپونيانى قورشاعان تەڭىزدە جانە اۋەدە اسكەري وپەراتسيالاردى بىرجاقتى جۇرگىزىپ كەلگەنىن، سونىڭ ىشىندە جاڭا اۋە وپەراتسيالارىن جۇزەگە اسىرۋ،  تالاستى ارالدار مەن سۋ ايدىندارىنا سۋاستى يادرولىق قايىقتارىن جىبەرگەنىن ايتتى.

وتكەن اپتادا جاپونيانىڭ قورعانىس مينيسترلىگى 2018 جىلعا ارنالعان جاپونيا قورعانىس جوسپارىنىڭ اق تىستى كىتابىن جاريالادى. كىتاپتىڭ 34 بەتىندە قىتايدىڭ جاپونياعا بولعان جاناما جانە اعىمداعى پراكتيكالىق قاتەرلەرى تولىقتاي باياندالادى، ءارى، قىتايدىڭ شىعىس قىتاي تەڭىزىندەگى جانە باتىس تىنىق مۇحيتىنداعى اسكەري ارەكەتتەرىنىڭ تەز ارادا ارتۋى مۇمكىن ەكەنىن ەسكەرتەدى.

دەگەنمەن، جاپونيا قورعانىس وكىلدەرى قىتايدىڭ جاپونياعا بولعان قاتەرى توكيونى جاپون-قىتاي قاتىناسىن رەتتەۋگە يتەرمەلەيدى دەپ قارايدى. جەكسەنبى كۇنى جاپونيانىڭ باس ءۋازىرى شينزو ابە «جاپونيا مەن قىتاي قاتىناسى دۇرىس باعىتتا جانە جاقسى دەڭگەيدە» دەپ باعالادى. ول الداعى ايدا ءوزىنىڭ ءىرى ساۋدا سەرىكتەسى بولعان قىتايعا ساپارلاي بارىپ، ساۋدا-ەكونوميكالىق قاتىناستى تەرەڭدەتۋگە تىرىسىپ كورمەك.

رەسمي بەيجىڭ ءوزىنىڭ  مالىمدەمەسىندە، جاپونيا قورعانىس مينيسترلىگى جاريالاعان اق تىستى كىتاپتاعى قىتايدىڭ جاپونياعا بولعان قاتەرىن جوققا شىعاردى. ءارى، قىتايدىڭ شىعىس قىتاي تەڭىزى مەن تىنىق مۇحيتتىڭ باتىس جاعالاۋىنداعى اسكەري ارەكەتتەرى بىرقالىپتى دەڭگەيدە ۇستاپ تۇرعانىن، ەشبىر ەلدىڭ ەگەمەندىگى قۇقىعىنا قول سۇقپايتىندارىن ايتىپ وتكەن.

“The Qazaq Times”