بريتان ءباسپاسوزى: پۋتين تالانتتى قارسىلاسقا شىدامايدى

«رەسەي دەموكراتيالىق وزگەرىستەر ءۇشىن ءپىسىپ-جەتىلدى، بىراق پۋتين تالانتتى قارسىلاسقا شىدامايدى»،-دەيدى Times الەكسەي ناۆالنىيعا جانە وعان شىعارىلعان ۇكىم قارساڭىندا جازىلعان رەداكتسيالىق ماقالادا دەپ جازدى BBC.

كيروۆتىڭ لەنين اۋداندىق سوتى ناۆالنىيدى شارتتى تۇردە 5 جىلعا باس بوستاندىعىنان ايىرۋ جانە «كيروۆلەسا» اتتى ءىس بويىنشا  500 مىڭ رۋبل كولەمىندە ايىپپۇل سالۋ ۇكىمىن شىعاردى. ۇكىممەن ساياساتكەر كەلىسپەيمىن جانە شاعىمدانامىن دەيدى.

ءبىر كەزدەرى كرەمل باسشىسىن «قۇبىرداعى قۇرباقاعا» تەڭەگەن، اتاقتى سوزدەردى ايتقان رەسەيلىك ديسسيدەنت الەكسەي ناۆالنىيدىڭ 2018 جىلى وتەتىن پرەزيدەنتتىك سايلاۋعا قاتىسۋ مۇمكىندىگى جوق سياقتى»- دەيدى باسىلىم.

«ەشقانداي بايىپتى وپپوزيتسيا مۇنىمەن ۆلاديمير ءپۋتيننىڭ سايلاۋ كەزىندە قايتا سايلانۋىنا قاۋىپ توندىرمەيدى» دەپ جالعاستىرادى Times.

كەشەگى ۇكىمنەن ميستەر ناۆالنىي ەمەس، رەسەيدىڭ ءوزى جەڭىلدى، دەپ پايىمدايدى گازەت. پۋتين باسقارعان جىلداردى Times رەسەيدىڭ جاس ازاماتتارىن ساياسي «اتەكتەرگە» (ەۆنۋح) اينالدىرعان، «نەمقۇرايلىق، شىدامسىزدىق پەن توقىراۋ ءداۋىرى» دەپ اتايدى.

«ناۆالنىيدىڭ كۇشى ونىڭ رەسەي قالالارىنداعى جاس تۇرعىندار اراسىندا ءۇمىت وتىن جاندىرا بىلۋىندە» دەپ بەلگىلەيدى باسىلىم.

«ناۆالنىيدا كولەمدى نارازىلىقتارعا ادامداردى جۇمىلدىرۋ دارىنى بار» دەپ جالعاستىرادى Times. باسشىلىق وسىدان قورقادى.

رەسەيدە گازەتتىڭ ساناۋى بويىنشا «ميلليوننان اساتىن 15 قالا» بار جانە كوپشىلىگى ەلدى ناشار باسقارىپ وتىرعان بيلىككە ابدەن نارازى. ناۆالنىيدىڭ داۋىسى قۇر دالاعا كەتكەن ايقايعا ۇقسامايدى. ول رەسەيدە وزگەرىس ەنگىزۋ ءۇشىن الىس نىسانامەن ويىن جۇرگىزۋ كەرەك ەكەنىن بىلەدى. جانە «ءتىرى قالۋ كەرەك». ءبىز وعان وڭايعا تۇسپەيتىن ەكى ىستە دە ساتتىلىك تىلەيمىز،- دەپ رەداكتسيالىق ماقالاسىن قورىتىندىلايدى Times.

فاريزا مۇقانوۆا

«The Qazaq Times»