اقش ۇكىمەتى وڭتۇستىك شىعىس ازيادان ءۇش ادامدى قاۋىپتى تەرروريست رەتىندە تىركەدى

اقش قازىنا دەپارتامەنتىنىڭ وتكەن اپتانىڭ سوڭىندا مالىمدەمە جاساپ، وڭتۇستىك شىعىس ازيادا ءۇش ادامنىڭ قاۋىپتى تەرروريست رەتىندە انىقتالعانىن، ءارى ولاردىڭ «يسلام مەملەكەتى» ۇيىمىمەن قاتىسى بار ەكەنىن ايتتى.

اقش قازىنا دەپارتامەنتىنىڭ مالىمەتىندە:  "مالايزيا ازاماتى مۋحامماد رافي ۋدان، يندونەزيالىق مۋحامماد ءال-كاليم يۋسوپ فايز جانە فيليپپيندىك مۋحامماد رەزا لاحامان گيرام قاتارلى ءۇش ادام 2016 جىلى «يسلام مەملەكەتى» ۇيىمى تاراتقان ءۇش تۇتقىننىڭ باسىن كەسۋ ارەكەتى تۇسىرىلگەن ۆيدەودا بار ەكەنى انىقتالدى", – دەلىنگەن.

قازىنا مينيسترلىگى اتالعان ءۇش ادامعا تولىقتاي قارجىلىق بۇعاتتاۋ جاساماق جانە اقش-تا ارنايى انىقتالعان جاھاندىق لاڭكەستەر قاتارىنا قوسادى.

ال، بۇۇ قاۋىپسىزدىك كەڭەسى بۇل ۇشەۋىن اتالعان ايىپتار بويىنشا تەرروريستىك ۇيىمنىڭ مۇشەسى رەتىندە تىركەدى. وعان قوسا، بۇۇ-عا مۇشە ەلدەردەن ولاردىڭ كەز-كەلگەن باعىتتاعى ساپارىنا تىيىم سالۋدى، مۇلكىن، قاراجاتتارىن بۇعاتتاۋدى، حالىقارالىق قارجى جۇيەسىن كىرۋىنە جول بەرمەۋدى تالاپ ەتتى.

“The Qazaq Times”