2019 جىلدان باستاپ بالاباقشاعا تۇرۋ كەزەگى  ەلەكتورندىق فورماتقا كوشىرىلەدى. بۇل تۋرالى بۇگىن ۇكىمەت وتىرىسىندا ءبىلىم جانە عىلىم ءمينيسترى ەرلان ساعاديەۆ مالىمدەدى.

ەرلان ساعاديەۆ جاڭا وقۋ جىلىنا دايىندىق بارىسىندا 99 بالاباقشاعا كۇردەلى جوندەۋ جۇرگىزىلىپ ونىڭ 72-ءسى اياقتالىپ قويعانىن ايتتى.

«ەندىگى ماڭىزدى جۇمىس – بالاباقشاعا كەزەككە تۇرۋ جانە جولداما بەرۋدى تولىعىمەن ەلەكتروندى فورماتقا اۋىستىرۋ. سوندا كەزەك جاريا تۇردە جانە تەز جىلجيدى. بۇل جۇمىس وسى جىلدىڭ اياعىنا دەيىن بارلىق وبلىستاردا اياقتالۋى ءتيىس”، – دەدى مينيستر.

جەرگىلىكتى بيۋدجەت قارجىسى ەسەبىنەن بالاباقشالاردىڭ جوندەۋ جۇمىستارىنا 1 ميلليارد 300 ميلليون تەڭگە قاراجات كوزدەلگەن. ءمينيستردىڭ ايتۋىنشا، اكىمدىكتەردىڭ اقپاراتىنا سايكەس، بالاباقشالار جاڭا وقۋ جىلىنا دايىن.

 

“The Qazaq Times”