اقش كونگرەسسىنىڭ رەسمي سايتىندا رەسەيگە قارسى سانكتسيالاردى كۇشەيتۋ جونىندەگى جاڭا زاڭ جوباسى جاريالاندى.

"كرەمل اگرەسسياسىنان امەريكا قاۋىپسىزدىگىن قورعاۋ تۋرالى زاڭ" دەپ اتالاتىن قۇجات اقش پرەزيدەنتى دونالد ترامپتىڭ رەسەي ليدەرى ۆلاديمير پۋتينمەن 16 شىلدەدە حەلسينكدە كەزدەسۋىنەن كەيىن ازىرلەنگەن. قۇجات ساياسي مالىمدەمەلەر مەن رەسەي ارەكەتىنە جاۋاپ رەتىندە بىرقاتار ناقتى قادامداردان تۇرادى.

زاڭ جوباسىندا قۇراما شتاتتار 1940 جىلى قابىلدانعان سوۆەت وداعىنىڭ بالتىق ەلدەرىن اننەكسيالاۋىن مويىنداماۋ جونىندەگى دەكلاراتسيا ۇلگىسى بويىنشا رەسەيدىڭ قىرىم اننەكسياسىن مويىندامايتىنى ايتىلعان. سونىمەن بىرگە قۇجات اقش پرەزيدەنتى اكىمشىلىگىنە ەلدىڭ ناتو قۇرامىنان شىعۋىنا باعىتتالعان قادامدار جاساۋىنا تىيىم سالادى.

بۇدان بولەك زاڭ جوباسىندا حيميالىق قارۋ قولدانعانى ءۇشىن (بريتانيانىڭ سولسبەري قالاسىندا سەرگەي جانە يۋليا سكريپالدىڭ ۋلانۋىنا قاتىستى), كيبەرشابۋىل جانە 2016 جىلى اقش پرەزيدەنتى سايلاۋىنا ارالاسقانى ءۇشىن رەسەي كىنالى دەپ تانىلعان.

قۇجات قابىلدانعاننان كەيىن، 180 كۇن ىشىندە اقش پرەزيدەنتى "رەسەي پرەزيدەنتى ۆلاديمير ءپۋتيننىڭ مۇددەسى ءۇشىن زاڭسىز جانە جەمقورلىق ارەكەتكە بارىپ جاتقان ساياساتكەرلەر مەن وليگارحتارعا جانە پۋتينمەن بايلانىسى بار ادامدار مەن ۇيىمدارعا قارسى سانكتسيالار ەنگىزۋى ءتيىس» دەلىنگەن.

قۇجات رەسەيدىڭ دەربەس قارىزىنا بايلانىستى ترانزاكتسيالارعا شەكتەۋ قويۋدى كوزدەيدى جانە اقش-تا رەسەيدىڭ سبەربانك، ۆتب، ۆنەشەكونومبانك جانە گازپرومبانك سەكىلدى ءىرى بانكتەرىنىڭ جۇمىس ىستەۋىنە تىيىم سالىنۋ قاراستىرىلعان.

زاڭ جوباسىندا اقش-تىڭ ۇلتتىق بارلاۋ قىزمەتى 180 كۇن ىشىندە كونگرەسسكە ۆلاديمير پۋتين مەن ونىڭ وتباسى مۇشەلەرىنىڭ جەكە اكتيۆتەرى جونىندە مالىمەت بەرۋ كەرەكتىگى ايتىلعان.

زاڭ جوباسى قابىلدانعاننان كەيىن 90 كۇن ىشىندە مەملەكەتتىك حاتشى كونگرەسسكە رەسەي "تەرروريزمدى قارجىلاندىراتىن مەملەكەت" ولشەمدەرىنە سايكەس كەلەتىنى، نە كەلمەيتىنى جونىندە پىكىر ءبىلدىرۋ كەرەك.

بۇل زاڭ جوباسى قاشان قارالادى، ازىرگە بەلگىسىز. رەسەيگە قارسى سانكتسيالار ەنگىزۋ تۋرالى زاڭ جوباسى بىلتىر كونرگەسستەگى ەكى پالاتادا كوپشىلىك داۋىسپەن قابىلدانعان.

“The Qazaq Times”