ەردوعان: وداقتاسپىن دەيسىڭ دە، وداقتاسىڭدى تۋ سىرتىنان وق اتقىڭ كەلەدى

تۇركيا پرەزيدەنتى رەجەپ تايىپ ەردوعان كەشە شەتەلدەگى وكىلەتتى ەلشىلەردىڭ كونفەرەنتسياسىندا مالىمدەمە جاسادى. ول اقش پرەزيدەنتى دونالد ترامپتىڭ سانكتسيا جونىندەگى شەشىمدەرىن جانە سىرتقى ساياساتىن جەردەن الىپ، جەرگە سالدى. سونداي-اق، تۇركياعا قىسىم جاساۋ ونىڭ حالىقارالىق جەتىستىكتەرىن كورە الماۋشىلىق دەپ باعالادى. بۇل تۋرالى سول ەلدىڭ «انادولى» اقپاراتتىق اگەنتتىگى حابارلادى.

ەردوعان سوزىندە «تۇركيا باسقا سالالاردا قىسىمعا ۇشىراعانى سەكىلدى، ەكونوميكادا دا ۇلكەن ءبىر قورشاۋمەن بەتپە-بەت كەلىپ وتىر»، – دەدى. ول جانە 2013 جىلعى گازي وقيعاسى، 17-25 جەلتوقسان ارالىعىنداعى قۇقىق سالاسىنا باعىتتالعان توڭكەرىس جانە 2016 جىلعى 15 شىلدە توڭكەرىسى سىندى ارەكەتتەردىڭ تاعىدا جالعاسۋى مۇمكىن ەكەن، تۇركيا بۇل سىندارعا توتەپ بەرۋگە دايىن بولۋ كەرەك ەكەنىن ەسكەرتتى.

تۇرىك پرەزيدەنتى سوزىندە: «ءبىزدىڭ بۇنداي سىندارعا تاپ كەلۋىمىزدىڭ سەبەبى – ۇلتتىق مۇددەمىز تۇرعىسىنان باس تارتپايتىن ۇستانىمدارىمىزدىڭ بولۋىنان»، – دەدى.

ەردوعاننىڭ سوزىندە ترامپتىڭ سىرتقى ساياساتىنا دەگەن كەكەسىن راي دا  انىق بايقالدى. ايتالىق: «پرەزيدەنتپىن دەپ ءبارىن جاساي بەرۋگە بولمايدى. مەملەكەت ەسەپتەرىنىڭ ءبارى ەلدىڭ ەرەجەلەرىنە ساي جاسالۋى كەرەك.  كەشتە جاتاردا «ەرتەڭ مەن بولاتقا قوسىمشا كەدەن سالىعىن كىرگىزەمىن» دەپ ويلاي سالۋعا بولا ما؟»، – دەدى.

ترامپ ساياساتىنا قاراتقان سوزىندە ەردوعان: «بىردە  ستراتەگيالىق سەرىگىم دەپ، سوڭىندا ستراتەگيالىق سەرىكتەسىنىڭ ارتىنان وق اتاسىڭ. ال، اۋعانستاننان ءبارى شەگىنىپ كەتكەن كەزدە مەنىمەن بىرگە بولا قالعىڭ كەلەدى. تاعى ءبىر جەردە ناتو-مەن وداقپىن دەيسىڭ دە، كەيىن وداقتاسىڭدى تۋ سىرتىنان اتقىڭ كەلەدى. مىنە، بۇلاردى قالاي قابىلداۋعا بولادى؟ بۇعان ءبىز كونە المايمىز»، – دەپ سالدى.

سوڭىندا، بۇنداي ساياساتتىڭ ءبارى دە ءوز جاۋابىن الاتىنىن ەسكەرتكەن ەردوعان، تۇركيا ەكونوميكاسى ءالى دە ءوز تۇعىرىندا ەكەنىن قاداي ايتىپ ءوتتى.

“The Qazaq Times”