باق: اۋىر جاراقات العان دايش جەتەكشىسى ءولىم اۋزىندا جاتىر

دايش تەررورلىق ۇيىمىنىڭ باسشىسى ءابۋ باكىر ءال-باعدادي اۋىر جاراقات الدى، - دەپ جازادى«yeniakit.com.tr» اگەنتتىگى. وزگە دە الەمدىك اقپارات كوزدەرى قازىرگى ۋاقىتتا ءال-باعداديدىڭ اۋىر جاراقاتىنىڭ كەسىرىنەن توپتى باسقارمايتىنىن، ونىڭ مىندەتتەرىن تۋنيستىك ءابۋ وسمان ءال-تۋنيسي اتقارىپ جاتقانىن حابارلاۋدا.

اتالعان اگەنتتىكتىڭ حابارلاۋىنشا، ءال-باعدادي ماۋسىم ايىندا ءسۇريانىڭ دايش تاراپىنان باسىپ الىنعان ەلدىمەكەندەردىڭ بىرىندە يراكتىق ااك-مەن (اسكەري اۋە كۇشتەرى) قاقتىعىس كەزىندە جارالانعان. وسى قاقتىعىس كەزىندە جۇزگە تارتا ادام زارداپ شەگىپ، ولاردىڭ كوپشىلىگى قازا تاپقان. ولاردىڭ اراسىندا بولعان ءال-باعدادي العان جاراقاتىنىڭ كەسىرىنەن قازىرگى تاڭدا جان ساقتاۋ بولىمىندە كورىنەدى. اقپارات قۇرالدارىنىڭ جازۋىنشا، ونىڭ ورنىنا تۋنيستىك ءابۋ وسمان ءال-تۋنيسي تاعايىندالعان. بۇدان بۇرىن، «يسلام مەملەكەتىنىڭ» (دايش) باسشىسى ءابۋ باكىر ءال-باعداديدىڭ ۇلى حۇدايفا ءال-بادري بولۋى مۇمكىن ەكەنى ايتىلعانمەن، قازىرگى تاڭدا ونىڭ دا رەسەيدىڭ سۇرياداعى اعك-ءنىڭ (اسكەري-عارىش كۇشتەرى) وپەراتسياسى كەزىندە قازا تاپقانى تۋرالى دەرەك بار. تاعى ءبىر بەيرەسمي مالىمەتتەر بويىنشا، ونىڭ ءسۇريانىڭ حومس قالاسىنا جاقىن ماڭدا سۇريالىق ۇكىمەتتىك اسكەريلەر تاراپىنان ولتىرىلگەنى ايتىلادى.

ال، دايش باسشىسى ءابۋ باكىر ءال-باعداديدىڭ ناقتى قايدا ەكەنى بەلگىسىز، بىراق الدىن الا بولجام بويىنشا، ونىڭ ءالى ءتىرى ەكەنى حابارلانۋدا.

“The Qazaq Times”