تۇرىك ليراسى بيىل 40 پايىز قۇنىن جوعالتىپ الدى. فوتو: PressTV.

تۇركيا پرەزيدەنتى رەجەپ تايىپ ەردوعان سەنبى كۇنى جاساعان مالىمدەمەسىندە قىتاي، رەسەي جانە ۋكراينا ەلدەرىمەن ۇلتتىق ۆاليۋتا ارقىلى ساۋدا جاساۋعا دايىن ەكەنىن ءبىلدىردى. ەردوعاننىڭ سوزىنەن ءبىر كۇن بۇرىن تۇرىك ليراسىنىڭ قۇنى تومەندەگەن بولاتىن. بۇل تۋرالى VOA جاڭالىقتار قىزمەتى حابارلادى.

تۇرىك پرەزيدەنتى بۇل مالىمدەمەسىن ءوزىنىڭ «ادىلەت جانە دامۋ» پارتياسىنىڭ جيىنىندا ايتقان بولاتىن. ەردوعان بۇل مالىمدەمەسى ارقىلى ەگەر ەۋروپالىق ەلدەر دوللار قىسىمىنان تاۋەلسىزدىك العىسى كەلەتىن بولسا، وندا تۇركيا ولارمەن سەلبەسەتىنىن ءبىلدىردى.

ەستەرىڭىزدە بولسا وسىدان بۇرىن تۇرىك قالتالىلارىنىڭ اقش-تا تەرروريزمگە قولداۋ كورسەتۋشى رەتىندە سوتتالۋى جانە ءسۇريا ماسەلەسى، فەتحۋللاح گۇلەن ءىسى بويىنشا ەكى ەل اراسىندا ارازدىق پايدا بولعان ەدى. اقش تارابى تۇركيانىڭ بىرقاتار لاۋازىمدىلارىنا سانكتسيا سالدى جانە ەكونوميكالىق سانكتسيا سالاتىنىن ايتىپ قورقىتتى.

بيىل، تۇرىك ليراسى ءوز قۇنىنىڭ 40 پايىزىن جوعالتىپ الدى. بۇل ترامپتىڭ تۇركياعا قاراتقان ساياساتتارىنا بايلانىستى بولدى.

ەردوعان وسىعان بايلانىستى ەۋروپا ەلدەرىنە دوللار قىسىمىنا قارسى بىرلەسۋ ەمەۋرىنىن تانىتىپ وتىر.

“The Qazaq Times”