رۋمىنياداعى نارازىلىق اكتسياسىنان زارداپ شەگۋشىلەر سانى 440 ادامنان استى

رۋمىنيا استاناسى بۋحارەستەگى قارسىلىق شاراسىنان زارداپ شەگۋشىلەر سانى ارتۋدا. سوڭعى مالىمەت بويىنشا، قازىرگى ۋاقىتتا ولاردىڭ سانى 440-قا جەتىپ تۇر. بۇل تۋرالى "Agerpres" اقپاراتتىق اگەنتتىگى حابارلايدى. بۇدان بۇرىن كەلىپ تۇسكەن اقپارات بويىنشا، 200 ادام زيان شەككەن ەدى.

شەرۋشىلەردىڭ تالابى — پارلامەنتتىڭ تاراتىلۋى، مەرزىمىنەن بۇرىن سايلاۋ، تەحنوكراتتار ۇكىمەتى، ادىلەتتىڭ ورناۋى، سونىمەن قاتار، 100-ءى ءارتۇرلى دياسپورا وكىلدەرىنەن قۇرالدان 300 سەناتور كىرەتىن بىرپالاتالىق پارلامەنت قۇرۋ.

بۇدان بولەك، حالىق سالىق جۇيەسى مەن زەينەتاقى رەفورماسىنا، الەۋمەتتىك كومەك جۇيەسىنە نارازى. ولار ەكونوميكا، اۋىلشارۋاشىلىعى مەن كاسىپكەرلىك سالالارىن دامىتۋدى قالايدى. سونىمەن قاتار، شەرۋشىلەر ەۋروپا وداعى، ناتو سياقتى ءىرى وداقتارمەن سەرىكتەستىك قارىم-قاتىناستى دامىتۋ، ەلەكتروندى داۋىس بەرۋ جانە دەموكراتيانى ورناتۋدى سۇراۋدا.

 “The Qazaq Times”