ساۋد-ارابياسى مەن كانادا اراسىنداعى كيكىلجىڭ ۋشىعۋدا

ساۋد-ارابيا بيلىگى كانادامەن مەديتسينا سالاسىنداعى  ىنتىماقتاستىعىن توقتاتىپ، وندا ەمدەلىپ جاتقان ازاماتتارىنىڭ ءبارىن وزگە ەلدەرگە اۋىستىرۋدا. بۇل تۋرالى ساۋد-ارابياسى دەنساۋلىق ساقتاۋ مينيسترلىگىنىڭ اقش پەن كاناداداعى وكىلى فاحد بين يبراھيم ءال تاميمي مالىمدەدى دەپ حابارلايدى «timeturk.com».

"كاناداداعى مەديتسينالىق باعدارلامالاردىڭ ءبارى توقتاتىلدى. ساۋد-ارابياسىنىڭ ازاماتتارى وزدەرىنىڭ قاۋىپسىزدىگى ءۇشىن كاناداداعى ەم-دومدارىن توقتاتادى",  - دەپ تۇسىندىرگەن ءال تاميمي.

بۇدان بۇرىن دا سايتىمىزدا جازعانىمىزداي، ءار-رياد پەن وتتوۆانىڭ اراسىنداعى كيكىلجىڭ ساۋديا بيلىگى 2012 جىلى تۇتقىندالعان بلوگەر رايف ءباداۆيدىڭ اپكەسى، قۇقىق قورعاۋشى سامار ءباداۆيدى قاماۋعا العاننان كەيىن باستالعان ەدى. ەسكە سالا كەتسەك، وسى جىلدىڭ ماۋسىم ايىندا ساۋديالىق ايەلدەردىڭ اۆتوكولىك جۇرگىزۋلەرىنە سالىنعان تىيىم الىپ تاستالعان ەدى. وسىعان قارسى شىعۋشى بەلسەندىلەردىڭ تۇتقىنداۋىنا بايلانىستى، كانادا ءسىم باسشىسى حريستيا فريلاند 2 تامىز كۇنى وسى وقيعاعا قاتتى الاڭدايتىنىن حابارلاعان ەدى. كەيىن ساۋديا كورولدىگى كانادالىق ەلشىنى «پەرسونا نون-گراتا» دەپ اتاپ، ونى 24 ساعات ىشىندە ساۋد-ارابياسى تەرريتورياسىنان كەتۋىن تالاپ ەتتى. سونىمەن قاتار، كانادامەن ينۆەستيتسيالىق جانە ساۋدالىق ترانزاكتسيانى بۇعاتتاۋعا شەشىم دە قابىلداعان بولاتىن. قازىرگى ۋاقىتتا اتالعان ەكى ەل اراسىنداعى شيەلەنىس حالىقارالىق دەڭگەيگە جەتىپ، وعان اقش-تا ءوز ۇستانىمىن ءبىلدىرىپ، بۇل داۋعا ارالاسپايتىنىن مالىمدەدى. سونىمەن قاتار، مەملەكەتتىك "Saudi" اۆياكومپانياسى كاناداعا ۇشاتىن رەيستەردى الىپ تاستادى.

 “The Qazaq Times”