ساۋد ارابياسى مەن كاتار اراسىندا قايتادان ديپلوماتيالىق جىلىمىق ورناماق. ساۋد ارابياسى ءوزىنىڭ كاتارعا باعىتتاعان بىرقاتار ەمبارگولارىن الىپ تاستاۋى مۇمكىن. بۇل تۋرالى كۋۆەيت ءسىم باسشىسى جاساعان مالىمدەمەدەن بەلگىلى بولدى.

2017 جىلى جاز الەم ەسىندە «كاتار داعدارىسى» دەگەن ديپلوماتيالىق داعدارىسپەن ەستە قالعان بولاتىن. ساۋد ارابياسى باستاعان بىرقاتار اراب ەلدەرى مەن كاتار اراسىندا ديپلوماتيالىق بايلانىستار ءۇزىلىپ، ساۋدا بايلانىستارى دا توقتاعان بولاتىن. ساۋد ارابياسى، مىسىر، باحرەين، بىرىككەن اراب امىرلىگى قاتارلى اراب ەلدەرى كاتاردى تەرروريزمگە قولداۋ كورسەتەدى دەپ ايىپتاعان، دوحا بولسا بۇل ايىپتى جوققا شىعارعان ەدى.

اراب ەلدەرىنىڭ كاتارعا قارسى شەكتەۋلەرىنىڭ الىنعانى تۋرالى حاباردى كۋۆەيت ءسىم باسشىسى احمەد ناسەر اس-ساباح ءبىر كۇن بۇرىن ەلدەگى مەملەكەتتىك تەلەارنادان مالىمدەدى. «بۇگىن تۇندە ساۋد ارابياسى مەن كاتار اراسىنداعى اۋە، قۇرلىق جانە تەڭىز شەكارالارىن اشۋ تۋرالى كەلىسىم جاسالدى»، – دەگەن اس-ساباح.

ونىڭ ايتۋىنشا، بۇل كەلىسىم سەيسەنبىدە ساۋد ارابياسى وتكىزگەن پارسى شىعاناعى ىنتىماقتاستىق كەڭەسىنىڭ سامميتىندە جاسالعان. سامميتكە كاتاردىڭ جوعارى لاۋازىمدىلارى دا قاتىسقان. بۇل «كاتار داعدارىسىنان» بەرى ەكى ەل لاۋازىمدىلارىنىڭ العاش كەزدەسۋى.

وسى ارادا كاتار مەن وزگە اراب ەلدەرى اراسىنداعى داۋدىڭ شەشىم تابۋىنا كۋۆەيت پەن اقش-تىڭ ارا اعايىندىق جاساعانىن ايتا كەتۋ كەرەك. كەزەكتى سامميتتە قول قويىلاتىن جاڭا كەلىسىمگە اقش لاۋازىمدىلارى دا قاتىساتىنى بەلگىلى بولدى. ۋاشينگتوننىڭ پىكىرىنشە، اراب ەلدەرى اراسىنداعى بۇنداي داۋ پارسى شىعاناعىنداعى ونسىزدا باسىم يران ىقپالىن ءتىپتى دە كۇشەيتىپ جىبەرەدى.

“The Qazaq Times”