تۇركيا وتاندىق قورعانىس ونەركاسىبىن قاۋىرت دامىتۋدا

تۇركيا پرەزيدەنتى رەجەپ تايىپ ەردوعان قورعانىس ونەركاسىبىنىڭ اتقارۋ كوميتەتىنىڭ جينالىسىن اشتى. بۇل جينالىستا تۇركيا قورعانىس ونەركاسىبىنىڭ اۋقىمدى جوبالارى تالقىعا تۇسپەك. «انادولى» اقپاراتتىق اگەنتتىگى حابارلادى.

ناتو مۇشەلەرىمەن بىرلەسىپ قورعانۋدىڭ سەنىمسىزدىگى تۇركيانى رەسەي اۋە قورعانىس جۇيەلەرىن ساتىپ الۋعا يتەرمەلەدى. ال، ناتو مەن تۇركيا اراسىنداعى سەنىمدىلىك ازايعان تۇستا، تۇركيا دەربەس قورعانىس قۋاتىن ارتتىرۋعا بار كۇشىن سالىپ جاتقانى بەلگىلى. ەردوعان تۇركيانىڭ قورعانىس سالاسىندا شەتەلگە تاۋەلسىز ەتۋدى رەفەرەندۋم الدىندا دا ۋادە ەتكەن بولاتىن.

قورعانىس ونەركاسىبى اتقارۋ كوميتەتىنىڭ كەزەكتى جينالىسىندا، تۇرىك قارۋلى كۇشتەرى جانە ىشكى ىستەر مينيسترلىگىنە قاراستى قاۋىپسىزدىك كۇشتەرىن قاجەتتىلىككە قاراي، زاماناۋي قارۋ-جاراق جانە كولىكپەن قامتاماسىز ماسەلەلەرىن تالقىلادى. وسىعان قاتىستى اۋقىمدى 48 جوبا ورتاعا سالىنىپ، تالقىلانعان.

اتالعان كوميتەتتىڭ مىندەتىندە، وتاندىق قاجەتتىلىكتى وتەگەننەن كەيىن شەتەلدىك تاپسىرىستاردى دا ورىنداۋ جۇكتەلگەن.

ناتو مەن تۇركيا اراسىندا رەسەيلىك اۋە قورعانىس جۇيەسىن ساتىپ الۋ داۋ-شارى كەزىندە انكارا تارابى «بولاشاقتا وتاندىق اۋە قورعانىس قۇرىلعىلارىن جاساپ شىعاراتىن بولامىز» – دەگەن مالىمدەمە دە جاساعان.

“The Qazaq Times”