ەرتەڭ تۇستە اقش-تىڭ يرانعا باعىتتاعان العاشقى سوققىسى جۇمسالادى

اقش-تىڭ مەملەكەتتىك حاتشىسى مايك پومپەو يران تۋرالى قايتالاي مالىمدەمە جاسادى. ول بۇل رەت يراندى قالىپتى ەلدەر سەكىلدى قادامدار جاساۋى كەرەك ەكەنىن ەسكەرتتى. سونىمەن بىرگە قۇراما شتاتتىڭ تەھران (تەگەران) بيلىگىنە قارسى ەكونوميكالىق سانكتسياعا دايىندالىپ بولعانىن حابارلادى. بۇل تۋرالى VOA باسىلىمى حابارلادى.

پومپەو جەكسەنبى كۇنى تۇستەن كەيىن باق وكىلدەرىنە تاراتقان مالىمەتىندە: «مەن يران حالقىنىڭ ۇلتتىق كوشباسشىلىققا كىمدەردىڭ يەلىك ەتۋى ماسەلەسىندە اشىق داۋىستارىن ورتاعا سالادى دەپ ۇمىتتەنەمىن»، – دەدى.

پومپەونىڭ مالىمدەۋىنشە، سەيسەنبى كۇنى 12:01-دەن باستاپ، يراننىڭ ونەركاسىبىنە قاراتىلعان سانكتسيا كۇشىنە ەنەدى. ءتىپتى مۇنىڭ ىشىنە يراننىڭ الەمگە تانىمال كىلەم ءوندىرىسى دە قامتىلعانى ءمالىم بولدى. ەۋروپا مەن امەريكانىڭ ۇشاقتارىن جانە بولشەكتەرىن ساتىپ الا المايدى.

ال يراننىڭ ەنەرگەتيكا ەكسپورتىنا باعىتتالاتىن سانكتسيا قاراشا ايىنا قاراي كۇشىنە ەنبەك.

پومپەونىڭ مالىمدەمەسىندە: «ءبىز الداعى ۋاقىتتا باسقا جولداردى تاڭداۋىمىزعا بولادى، بىراق، تەك يراننىڭ رەجيمى ءوز ساياساتىن وزگەرتكەندە عانا»، – دەلىنگەن.

اقش سانكتسياسىنىڭ باستالۋى ەكى ەل اراسىنداعى شەكىسپەي بەكىسپەيتىن تەكە-تىرەستىڭ شىنداپ باستالعانىن تۇسىندىرەدى. ەكى ەل اراسىنداعى قايشىلىق «ەكىنشى شىعاناق سوعىسىن» تۋدىرۋى مۇمكىن دەگەن بولجامدار بار.

“The Qazaq Times”