ۋساما بەن لادەننىڭ اناسى ۇلى تۋرالى العاش رەت سۇحبات بەردى

«ءال كايدا» ۇيىمىنىڭ بۇرىنعى جەتەكشىسى ۋساما بەن لادەننىڭ اناسى اليا گانەم  بالاسىنا قاتىستى العاش رەت سۇحبات بەرىپ، ۇلىنىڭ راديكاليستەردىڭ ىقپالىنا قالاي تاپ بولعانى تۋرالى دا تولىعىراق اشىپ ايتتى. بۇل تۋرالى «liberation.fr» سايتى ا. گانەمنىڭ «The Guardian»-عا بەرگەن سۇحباتىنا سىلتەمە جاساپ حابارلايدى.

ايەلدىڭ ايتۋىنشا، ونىڭ بالاسى وتە اقىلدى بولعان ءارى ساباعىن دا جاقسى وقىعان. ال، راديكاليستەردىڭ ىقپالىنا ساۋد-ارابياسىنىڭ دجيددە قالاسىنداعى ابدۋلازيز كورول اتىنداعى ۋينۆەرسيتەتتىڭ ەكونوميكا فاكۋلتەتىندە وقىپ جۇرگەندە ۇشىراعان. وسىدان كەيىن ول مۇلدەم باسقا ادامعا اينالعان.

«باسىن اينالدىرعان ادامدار پايدا بولعانعا دەيىن ول وتە جاقسى بالا بولدى. سول كەزدە ول بار بولعانى 20-نىڭ ار جاق-بەر جاعىندا ەدى. مۇنى سەكتا دەپ اتاۋعا بولادى. ول ماعان نەمەن اينالىسىپ جۇرگەنىن ەشقاشان ايتپادى. سەبەبى مەنى قاتتى جاقسى كوردى»، - دەگەن ا.گانەم «The Guardian»-عا بەرگەن سۇحباتىندا.

تەرروريست وتباسىمەن سوڭعى رەت 1999 جىلى اۋعانستاننىڭ كانداگار قالاسىنا جاقىن ورنالاسقان بازادا كەزدەسكەن. اناسىنىڭ سوزىنشە، ۋساما بەن لادەن جاقىندارىن كورگەنىنە قاتتى قۋانعان.

«The Guardian» ۋساما بەن لادەننىڭ ىنىلەرى — احماد پەن حاسساننان دا سۇحبات العان. ولاردىڭ سوزىنشە، انالارى ەشقاشان بالاسىن تەرروريست رەتىندە كورمەگەن. احماد پەن حاسسان 11 قىركۇيەك وقيعاسىنىڭ ۋسابا بەن لادەننىڭ ءىسى ەكەنىن بىلگەننەن كەيىن ول ءۇشىن ۇيالعاندارىن دا ايتقان. «ءبىز كەيىن اسا قيىن جاعدايدا قالاتىنىمىزدى دا بىلدىك»، - دەگەن بەن لادەننىڭ ءىنىسى احماد.

2001جىلدىڭ 11 قىركۇيەگىندە اقش-تا ءىرى تەراكت ورىن الىپ، سالدارىنان 2977 ادام قازا تاۋىپ، 24 ادام ءىز-ءتۇسسىز كەتكەن ەدى. وسى ءىستى ۋساما بەن لادەن باسقاراتىن «ءال كايدا» ءوز موينىنا العان. بەن لادەننىڭ قايتىس بولعانى تۋرالى حابار 2011 جىلى تاراعان ەدى. ونىڭ پاكىستاندا امەريكالىق ارنايى بولىمشە تاراپىنان ولتىرىلگەنى تۋرالى حابارلانعان.

“The Qazaq Times”