فوتو: stanradar.com

يران يسلام رەسپۋبليكاسىنىڭ كۇزەت كورپۋسىنىڭ كومانديرى موحامماد ءالي دجافاري اقش پرەزيدەنتى دونالد ترامپتىڭ يران باسشىسىمەن كەزدەسۋ تۋرالى ۇسىنىسىنا جاۋاپ بەرىپ، يراننىڭ بۇل ۇسىنىستى مۇلدەم قابىلدامايتىنىن ايتتى. 

«Fars News» اگەنتتىگىنىڭ حابارلاۋىنشا، يراندىق گەنەرال-مايور اقش پرەزيدەنتىنە جاساعان مالىمدەمەسىندە يسلام رەسپۋبليكاسىنىڭ سولتۇستىك كورەيا ەمەس ەكەنىن تيىسىنشە اتاپ وتكەن.

«ترامپ مىرزا! يران — ءسىزدىڭ كەزدەسۋ تۋرالى ۇسىنىسىزدى قابىلداي بەرەتىن سولتۇستىك كورەيا ەمەس...  ءتىپتى اقش-تىڭ كەلەسى پرەزيدەنتى دە بۇنداي كەزدەسۋگە قول جەتكىزە المايدى»، - دەگەن.

ەسكە سالايىق، ءبىر-ەكى كۇن بۇرىن عانا اقش پرەزيدەنتى دونالد ترامپ يران پرەزيدەنتى حاسان رۋحانيمەن كەزدەسۋگە دايىن ەكەنىن مالىمدەگەن ەدى. ال، يران پرەزيدەنتى اكىمشىلىگى باسشىسىنىڭ ورىنباسارى حاميد ابۋتالەبي يراندىق بيلىكتىڭ اقش يراننىڭ يادرولىق كەلىسىمشارتىنا قايتا قوسىلعان جاعدايدا عانا ەكىجاقتى كەلىسسوزدەردى جاڭعىرتۋعا دايىن ەكەنىن حابارلاعان بولاتىن.

“The Qazaq Times”