اقش پەن «تاليبان» قوزعالىسى وكىلدەرى دوحا قالاسىندا كەلىسسوزدەر جۇرگىزۋدە – دەپ حابارلايدى Reuters اقپارات اگەنتتىگى.

اگەنتتىك مالىمەتىنشە، اقش پەن «تاليبان» قوزعالىسى وكىلدەرى كاتاردىڭ دوحا قالاسىندا كەزدەسىپ، اۋعانستانداعى سوعىسقا قاتىستى كەلىسسوزدەر جۇرگىزگەن. كەلىسسوز بارىسىندا قوس تاراپ اۋعانستان داعدارىسىن بەيبىت جولمەن شەشۋ جانە ۋاقىتشا سوعىستى توقتاتۋعا ۋاعدالاسقان.

«The New York Times» باسىلىمىنىڭ حابارلاۋىنشا، دوحاداعى كەزدەسۋگە اقش تاراپىنان مەملەكەتتىك دەپارتامەنتتىڭ وڭتۇستىك ازيا ماسەلەلەرى ءبولىمىنىڭ باسشىسى ەليس ۋەللس قاتىسقان. ال «تاليبان» قوزعالىسى تاراپىنان كاتارعا ءتورت ادام كەلگەن. بىراق ولاردىڭ كىم ەكەندىگى ازىرگە بەلگىسىز.

ەستەرىڭىزگە سالايىق، بۇعان دەيىن اۋعانستان ۇكىمەتى مەن «تاليبان» قوزعالىسى قۇربان ايت كەزىندە سوعىستى ۋاقىتشا توقتاتۋ جونىندە كەلىسىمگە كەلگەن. كەيىننەن ەل پرەزيدەنتى اشراف گاني «تاليبان» تاراپىن بەيبىتشىلىك مەرزىمىن ۇزارتۋعا شاقىرعان. بىراق «تاليبان» وكىلدەرى پرەزيدەنتتىڭ بۇل ۇسىنىسىمەن كەلىسپەيتىندىكتەرىن ايتىپ، ۇكىمەت اسكەرىنە ءبىرىنشى بولىپ وق اتقان.

“The Qazaq Times”