BRICS-ءتىڭ باستى ماقساتى ەركىن ساۋدا قاتىناسىن ساقتاپ قالۋ

وڭتۇستىك افريكادا وتكەن BRICS ءماجىلىسىنىڭ ورتاق دەكلاراتسياسى باتىس الەمىندە قوجىراي تۇسكەن ەركىن ساۋدا قاتىناسىن الەمدىك دەڭگەيدە قايتا قالپىنا كەلتىرۋگە باعىتتالىپ جاسالدى. برازيليا، رەسەي، ءۇندىستان، قىتاي جانە وڭتۇستىك افريكا ءسامميتى الەمدىك ەركىن ساۋدا قاتىناسىن قورعاۋ مەن ايماقتارداعى قاقتىعىستاردى رەتتەۋدى تاقىرىپ ەتكەن بولاتىن.

10-شى رەت ءوتىپ وتىرعان BRICS ءسامميتىنىڭ قورىتىندى دەكلاراتسياسىندا: «دۇنيەجۇزىلىك ساۋدا ۇيىمىنىڭ ەرەجەلەرى اياسىندا الەمدىك ەركىن ساۋدا قاتىناسىن قورعايمىز جانە دامىتامىز» دەلىنگەن. دەكلاراتسيادا الەم ەكونوميكاسى تەك قانا اشىق، ەركىن ساۋدا قاتىناسىندا عانا داميتىنىن باس ايتقان.

سوڭعى جىلدارى، ەۋروپا مەن امەريكاداعى كەيبىر ساياسي وزگەرىستەر ايتالىق، ۇلىبريتانيانىڭ ەو-دان باس تارتۋى، ترامپتىڭ اقش پرەزيدەنتى بولىپ سايلانۋى دامۋشى ەلدەردى جانداندىرعان ەركىن ساۋدا قاتىناسىن قايتا قاراۋعا يتەرمەلەدى. اسىرەسە، قۇراما شتاتتىڭ كوپجاقتى كەلىسىمدەردىڭ بىرقاتارىنان باس تارتىپ، ەكى نەمەسە ءۇش جاقتى كەلىسىمدەر ارقىلى ساۋدا ساياساتىن ۇستانۋى ەركىن ساۋدا قاتىناسىنا كەرى ىقپالدار ەتە باستادى. دامۋشى ەلدەردىڭ كوش باسىندا تۇرعان اتالعان بەس مەملەكەت قازىر باتىستا قوجىراپ قالعان ەركىن ساۋدا قاتىناسىن قورعاۋدى ءتۇبىرلى مۇددەلەرى رەتىندە قاراستىرىپ وتىر.

“The Qazaq Times”