وزبەكستان سىرتقى ىستەر ءمينيسترى ابدۋلازيز كاميلوۆ: «ءبىز اقش-قا اقتالۋ ءۇشىن كەلگەن جوقپىز» - دەپ مالىمدەدى.

ابدۋلازيز كاميلوۆ باستاعان وزبەكستان دەلەگاتسياسى شىلدە ايىنىڭ 25-ءى كۇنى ۋاشينگتوندا «وزبەكستانداعى ءدىني بوستاندىقتىڭ جاڭا ەراسى» اتتى ءباسپاسوز ءماسليحاتىن وتكىزدى. وندا ابدۋلازيز كاميلوۆ جۋرناليستەردىڭ «وزبەكستان ءۇشىن اقش استاناسىندا ءدىني بوستاندىق جونىندە مالىمدەمە جاساۋ ماڭىزدى ما؟» دەگەن سۇراقتارىنا: «ءبىزدىڭ اقش-پەن قارىم-قاتىناسىمىز كەشە عانا باستالعان جوق. كۇن تارتىبىندە ءدىني بوستاندىق تاقىرىبى تۇر. بۇل تاقىرىبتىڭ وزبەكستان مەن اقش قارىم-قاتىناسىندا الاتىن ورنى ەرەكشە. سەبەبى بۇل ادام قۇقىعى، بەيبىتشىلىك جانە تاڭداۋ قۇقىعىمەن تىكەلەي بايلانىستى. كەيدە وزبەكستانعا قاتىستى ءتۇرلى سىني مالىمدەمەلەر جاسالادى. بىراق ءبىز اقش-قا ونى جوققا شىعارىپ، اقتالۋ ءۇشىن كەلگەن جوقپىز. ءبىز تاجىريبە الماسۋ ارقىلى الدا تۇرعان ماسەلەلەردى بىرلەسىپ شەشۋ ءۇشىن كەلدىك» - دەپ جاۋاپ بەرگەن.

ەستەرىڭىزگە سالايىق، وزبەكستان سىرتقى ىستەر ءمينيسترى ابدۋلازيز كاميلوۆ 24 شىلدە كۇنى اقش-قا رەسمي ىسساپارمەن بارعان. وندا ول ءدىني بوستاندىق تاقىرىبى بويىنشا مينيسترلىكتەر اراسىنداعى حالىقارالىق كونفەرەنتسياعا قاتىسقان جانە ۋاشينگتوندا بىرقاتار ەكى جاقتىق كەزدەسۋلەر وتكىزگەن.

“The Qazaq Times”