فوتو: gepatitc.net

2017 جىلدىڭ ستاتيستيكالىق دەرەكتەرىنە سۇيەنەتىن بولساق، استانا قالاسىندا گەپاتيت اۋرۋىنا شالدىققان 7005 ادام تىركەلدى: ونىڭ 95-ءى بالا ء(ارتۇرلى جاستاعى بالالار مەن جاسوسپىرىمدەر) جانە 6910-ى ەرەسەك ادام.

ادام اعزاسىنداعى ەڭ ماڭىزدى قىزمەتتەردىڭ ءبىرىن باۋىر اتقاراتىنى بەلگىلى. باۋىر ادام اعزاسىنىڭ حيميالىق زەرتحاناسى بولىپ سانالادى، ويتكەنى قاندى تازارتۋ مەن ۋلى زاتتاردان ارىلتۋعا كومەكتەسەتىن باستى ىشكى مۇشەلەردىڭ قاتارىنا جاتادى. 300 ميللياردقا جۋىق باۋىرداعى جاسۋشا قاننان اعزاعا قاجەتتى قىشقىلدار مەن قورەك بولار ونىمدەردى ءبولىپ الىپ، سۇزگىدەن وتكىزىپ، قاجەتتى جەرىنە جەتكىزىپ وتىرادى.

گەپاتيت نەمەسە سارى اۋرۋ – گەپاتيت ۆيرۋستارى مەن ينفەكتسيالاردان بولاتىن باۋىردىڭ وتكىر جانە سوزىلمالى قابىنۋ اۋرۋلارى. گەپاتيتتىڭ ا، ۆ، س، D جانە E تۇرلەرى بارى بەلگىلى. ولاردىڭ ارقايسىسىنىڭ ءوز ەرەكشەلىكتەرى بار.

گەپاتيت كوبىنەسە سيمپتومسىز وتەدى نەمەسە باسقا اۋرۋلاردىڭ سيمپتومدارىنا ۇقساس كەلەتىندىكتەن، دياگنوزدى دەر كەزىندە قويۋ قيىن. سونىسىمەن گەپاتيت قاۋىپتى اۋرۋ بولىپ سانالادى. اسقىنۋىنىڭ سالدارىنان باۋىر تسيرروزى، باۋىر ىسىگى، فيبروز سياقتى قاۋىپتى سىرقاتقا الىپ كەلەدى.

گەپاتيت ۆيرۋستارى لاستانعان تاعامدار مەن سۋ پايدالانۋ، انتيسانيتارلىق جاعدايدا ءومىر ءسۇرۋ، ۆيرۋس جۇققان قاندى قۇيۋ، بوسانۋ كەزىندە جۇقتىرۋ، جىنىستىق قاتىناس، اعزاعا ۋلى زاتتاردىڭ ءتۇسۋى، جەكە گيگيەنا تالاپتارىن ساقتاماۋ سياقتى ءتۇرلى جولدار ارقىلى بەرىلەدى. ال ۆيرۋستان قورعانۋدىڭ ەڭ باستى جولى – اۋرۋدىڭ الدىن الۋ، ياعني جەكە تازالىقتى ساقتاۋ، تازا اۋىز سۋدى تۇتىنۋ، قاۋىپسىز جىنىستىق بايلانىس، ناشاقورلىق قۇرالداردى قولدانۋدان باس تارتۋ، كوسمەتيكالىق شارالاردى ارنايى مەكەمەلەردە جاساتۋ، ينەكتسيا ءۇشىن ءبىر رەتتىك ينە مەن ءشپريتستى قولدانۋ، قان ونىمدەرىنىڭ قاۋىپسىزدىگىن قامتاماسىز ەتۋ، ۆاكتسيناتسيا جاساۋ.

-يممۋنداۋ شاراسى جىل سايىن 2-3 ميلليون ادامنىڭ ءومىرىن ساقتاپ قالۋعا مۇمكىندىك بەرەدى. قازاقستاندا سوڭعى 25 جىلدا جاپپاي ەكپە جاساۋ ناتيجەسىندە ۆ گەپاتيتىمەن اۋىرعان بالالار سانى 1234,5, ەرەسەكتەر سانى 311,5 ەسە ازايعان. قازىرگى تاڭدا گەپاتيتتەن قورعانۋدىڭ ەڭ ءتيىمدى جولى – ەكپە سالدىرۋ. بۇل رەتتە مەملەكەت كەپىلدەندىرىلگەن تەگىن مەديتسينالىق كومەك پاكەتى ارقىلى ازاماتتارعا قاۋىپتى اۋرۋلاردىڭ، سونىڭ ىشىندە، گەپاتيتتىڭ الدىن الۋعا زور مۇمكىندىك بەرەدى»، - دەدى «امسق» كەاق استانا قالاسى بويىنشا فيليالىنىڭ ديرەكتورى ن.قابدىقاپاروۆ.

“The Qazaq Times”