ءجۇرسىن ەرمان مۇحتار مەن بولاتبەكتىڭ "جەكپە-جەگىن" وتكىزەدى

ەستەرىڭىزدە بولسا، 5 جىلدان بەرى وتكىزىلىپ كەلەتىن ءداستۇرلى «التىن دومبىرا» الامانىنىڭ 2016 جىلعى قورىتىندىسى حالىقتىڭ نارازىلىعىن تۋدىرعان بولاتىن. 3-4 جەلتوقسان كۇندەرى الماتىداعى  رەسپۋبليكا سارايىندا وتكەن ءدۇبىرلى دودادا، قازىلار القاسىنىڭ شەشىمىمەن، التىن دومبىرا جانە 5 ميلليون قارجىلاي جۇلدە مۇحتار نيازوۆقا بۇيىرعان.

ايتىسكەرلەردى ماراپاتتاۋ ساتىندە حالىق دۋ كوتەرىلىپ، نارازىلىق تانىتقان ەدى. وعان سەبەپ:  حالىق باس جۇلدەگە بولاتبەك ورازباەۆاتى لايىق دەپ تانىعان. پىكىر ەكىگە جارىلدى. ءبىرى سايىستى ءادىل بولدى دەسە، ەندى ءبىرى وعان داۋ ايتىپ جاتتى. ارادا 2 اي وتسە دە «التىن دومبىرا» توڭىرەگىندەگى بۇل داۋ حالىقتىڭ كوڭىلىندە قالدى، ءالى كۇنگە دەيىن قىزۋ تالقىلانىپ جاتقان ماسەلە. سونى ەسكەرە كەلە، ءجۇرسىن ەرمان 2017 جىلى،  6 اقپان كۇنى، 28-ءشى بۇكىلالەمدىك قىسقى ۋنيۆەرسيادا اياسىندا، الماتى قالالىق اكىمدىگىنىڭ قولداۋىمەن، «ونەر الدى – قىزىل ءتىل» اتتى رەسپۋبليكالىق ستۋدەنتتەر ايتىسىنىڭ ماراپاتتاۋ ساتىندە اتاپ وتكەن بولاتىن:

«جاقىندا «التىن دومبىرادا»  مۇحتار نيازوۆتىڭ جەڭىسىنە كۇمان بولدى. “بايگە دۇرىس بولمادى، مۇحتارعا ەمەس، بولاتبەككە بەرىلۋى كەرەك ەدى” دەگەن شۋ كوتەرىلدى. ەگەر جۇلدە بولاتبەككە بۇيىرسا، بالكىم، مۇحتارعا بەرىلۋى كەرەك دەگەن شۋ شىعار ما  ەدى؟!. سونىڭ ورنىن تولتىرايىق دەپ،  دال وسى زالدا [«الاتاۋ» ءداستۇرلى ونەر تەاترىندا – رەد] ەكى اقىننىڭ  جەكپە-جەگىن وتكىزگىم كەلەدى. ەكەۋىن "شايقاستىرىپ" كورەيىك دەپ شەشتىم. ايتىس دەيتىن جانىڭدى جەپ ايتاتىن، رۋحى بيىك ونەر عوي. ماسەلە كىم جەڭگەندە ەمەس، بۇگىن بىرەۋىنىڭ جولى بولسا، ەرتەڭ ەكىنشىسىنىڭ ايى وڭىنان تۋار. ەكەۋى دە سۇراپىل اقىندار. ايتىسقا  جارناما بولسىن دەپ، حالىقتىڭ دا قۇمارى قانسىن دەپ بايگە ىزدەپ جاتىرمىز. الداعى ۋاقىتتا قۇلاقتارىڭىز ءتۇرۋلى ءجۇرسىن».

«The Qazaq Times»