25 شىلدەدە تاجىك-اۋعان شەكاراسىندا دۋشانبەنىڭ ءتورت جاس تۇرعىنى اۋعانستانعا زاڭسىز وتپەك بولعان جەرىنەن ۇستالعان. بۇل جونىندە تاجىكستاننىڭ ەسىرتكىگە قارسى كۇرەس اگەنتتىگىنىڭ وكىلى حابارلادى.

17-18 جاستاعى جاس جىگىتتەر اۋعانستانعا ءوتىپ، "يسلام مەملەكەتى" (يم) تەرروريستىك توبىنا قوسىلماق بولعاندارىن مويىنداعان.

ۇستالعان ءتورت ءجاسوسپىرىمنىڭ تورتەۋى دە دۋشانبە مەكتەپتەرىنىڭ بىرىندە بىرگە وقىعان. ەسىرتكىگە قارسى كۇرەس اگەنتتىگىنىڭ وكىلى مۋحاببات ابدۋللوزودانىڭ ايتۋىنشا، اتالعان جاستار الدىندا دا شەكاراعا بىرنەشە رەت كەلىپ، پياندج وزەنىنەن قالاي ءوتۋ كەرەكتىگىن تەكسەرىپ كەتكەن.

تاجىكستان مەن اۋعانستان اراسىنداعى شەكارا قاشىقتىعى - 1400 شاقىرىم. بيىل كوكتەمدە تاجىكستان پرەزيدەنتى ەمومالي راحمون "يسلام مەملەكەتى" قۇرامىنداعى ونداعان تاجىك سودىرى ءسۇريا جانە يراكتاعى سوعىستان جەڭىلىستەن كەيىن، اۋعانستانعا ءوتىپ كەتكەنىن، ولاردىڭ تاجىكستان جاستارىن تارتۋى مۇمكىن ەكەنىن ايتىپ، قاۋىپتەنگەن.

“The Qazaq Times”