بۇرىنعى كەڭەسشىسى ترامپتىڭ شەكسىز بيلىگى بار ليدەرلەردى ۇناتاتىنىن ايتتى

ترامپ قۇراما شتات پرەزيدەنتى بولىپ سايلانعاننان بەرى ونىڭ ساياساتى مەن ۇستانىمدارى ءتۇرلى سىن-پىكىرلەرگە تاپ بولىپ كەلەدى. جاقىندا پرەزيدەنت ترامپتىڭ بۇرىنعى رەسمي كەڭەسشىسى ستيۆە بەننون (Steve Bannon) ونىڭ ۇلتشىل، قولىندا شەكسىز بيلىگى بار ليدەرلەردى ۇناتاتىنىن ايتقان.

ستيۆە بەننون CNBC كونفەرەنتسياسى كەزىندە ترامپتىڭ ۆلاديمير پۋتين، شي جينپيڭ، رەجەپ تايىپ ەردوعان سەكىلدى بيلىك قۋاتى مىعىپ ليدەرلەردى ۇناتاتىنىن ايتىپ بەرگەن. ترامپتىڭ ويىنشا ولار ۇلتشىل، ءوز ەلىنىڭ مۇددەسىن باستى ورىنعا قوياتىن جانە دەگەنىنە جەتە العان باسشىلار ەكەن.

رەسەي پرەزيدەنتى پۋتين، قىتاي توراعاسى شي جينپيڭ جانە تۇرىك ەلىنىڭ پرەزيدەنتى ەردرعان قاتارلى ليدەرلەر باتىس ەلدەرىنىڭ اقپارات قۇرالدارىندا، دارا بيلەۋشى نەمەسە ءاۆتوريتاريزمدى جولعا قويۋشى باسشىلار رەتىندە ايتىلادى. دەگەنمەن، ترامپ وسى اتالعان باسشىلاردىڭ دەگەنىنە جەتىپ، بيلىك قۋاتىنىڭ شەكسىز بولىپ وتىرعانىنا قىزىعاتىنىن ءبىر ەمەس بىرنەشە رەت اڭعارتقان ەدى.

ناۋرىز ايىندا قىتاي كومپارتياسى كونستيتۋتسياعا وزگەرىس ەنگىزۋ تۋرالى ۇسىنىس جاساپ، قىتاي توراعاسىنىڭ بيلىك وكىلەتتى مەرزىمىن شەكتەۋدى الىپ تاستاۋ تۋرالى باستاما كوتەرگەن. سول ءتۇستا جۋرناليستەر ترامپتان بۇل تۋرالى كوزقاراسىن سۇراعاندا: «بۇل ارينە قىتاي ءۇشىن ءتيىمدى بولار. ول ءوزىنىڭ ىستەگىسى كەلگەنىن ىستەي الدى. ۋاقىتى كەلگەندە ءبىز دە مۇنى سىناپ كورەرمىز»، – دەپ ءازىل-شىنى ارالاس كوز كوزقاراسىن اڭعارتقان ەدى. اقش-تاعى ساياسي قىسىمعا قاراماستان رەسەي پرەزيدەنتىمەن كەزدەسۋ وتكىزدى. ءتىپتى، تاعى ءبىر مارتە كەزدەسۋى مۇمكىن ەكەنىن دە ەسكەرتتى.

“The Qazaq Times”