ناتو ەلدەرى قورعانىس سالاسىنا جۇمسالاتىن شىعىن كولەمىن ارتتىرۋعا كەلىستى. بۇندا اقش-تىڭ ءرولى قانداي بولماق؟

ناتو ەلدەرى وتكەن جىلمەن سالىستىرعاندا، قورعانىسقا 33 ملرد دوللار ارتىق قارجى جۇمساماق. بۇل تۋرالى «france24.com/fr» اگەنتتىگى حابارلادى.

11-13 شىلدە كۇندەرى بەلگيا استاناسى بريۋسسەلدە ءوتىپ جاتقان ناتو-نىڭ سامميتىندە اقش پرەزيدەنتى دونالد ترامپ ناتو-عا مۇشە 29 ەلدىڭ تەك 5-ءۋى ءوز مىندەتتەرىن اتقارادى جانە قورعانىسقا وزدەرىنىڭ ءىجو-نەن 2%  جۇمسايدى، ال اقش بارىنەن دە ارتىق، ياعني ءجىو-نەن 4 % جۇمسايدى دەگەن بولاتىن. اقش باسشىسى كەلەشەكتە ناتو-عا مۇشە بارلىق ەلدەردىڭ قورعانىس شىعىندارى ولاردىڭ ءىجو-نەن 4%-عا دەيىن جەتەدى دەپ كۇتەتىنىن دە جاسىرمادى. اقپارات كوزدەرىنىڭ مالىمەتىنشە، ەگەر وزگە مۇشە-ەلدەر قورعانىس شىعىندارىن ارتتىرماسا، ترامپ اقش-تىڭ ناتو قۇرامىنان شىعاتىنىن ايتىپ، ەسكەرتۋ جاساعانىن جازۋدا. وسى ورايدا، ناتو ءسامميتىنىڭ ءباسپاسوز وتىرىسىندا باس حاتشى يەنس ستولتەنبەرگ ترامپپەن ەكىجاقتى اڭگىمەدەن كەيىن ەۋروپالىق وداقتاستار مەن كانادا قورعانىس سالاسىنا قوسىمشا 14 ملرد دوللار شىعارۋعا كەلىستى دەپ مالىمدەدەى. ونىڭ ايتۋىنشا، اليانس مۇشەلەرى قورعانىسقا جۇمسالاتىن شىعىن كولەمىن ارتتىرۋعا كەلىسكەن. «بۇل اقش-قا وزدەرىنىڭ شىعىندارىن ازايتۋعا مۇمكىندىك بەرەدى. بۇگىن وداقتاستاردىڭ بارلىعى وزدەرىنىڭ ۇلەستەرىن ارتتىرۋعا كەلىستى. بۇل — ناتو-نىڭ الەۋەتىن بۇرىنعىدان دا ارتتىرا تۇسەدى»، - دەدى ستولتەنبەرگ. سولتۇستىكاتلانتيكالىق اليانستىڭ باسشىلارى ماكەدونيانىڭ دا اتالعان ۇيىمعا مۇشەلىگى تۋرالى كەلىسسوزدەردى اشۋعا كەلىستى. وسى جىلدىڭ قورىتىندى ەسەبى بويىنشا، ناتو-نىڭ ءىجو-نەن 2 پايىزىن قورعانىسقا جۇمسايتىن ەۋروپالىق مۇشەلەرى بۇل كورسەتكىشتى 7-گە جەتكىزۋگە مىندەتتەلدى.

“The Qazaq Times”