قىتاي اراب ەلدەرىنە جالپى سوماسى 20 ملرد دوللار قۇرايتىن نەسيە بەرۋگە نيەتتى. سونىمەن قاتار، ءسۇريا، يوردانيا جانە يەمەن ەلدەرىنە گۋمانيتارلىق كومەك جىبەرمەك. بۇل تۋرالى «fr.euronews.com» اگەنتتىگى حابارلايدى.

مۇنداي مالىمدەمەنى قحر باسشىسى شي جينيڭ (سي تسزينپين) بەيجىڭدە وتكەن قىتاي-اراب ىنتىماقتاستىق فورۋمىندا سىرتقى ىستەر مينيسترلەرىنىڭ اشىق جيىنىندا مالىمدەگەن. ونىڭ سوزىنشە، بەيجىڭ اراب ەلدەرىنە «تۇرعىندارىنىڭ جۇمىسقا ورنالاسۋلارى ءۇشىن ۇلكەن مۇمكىندىكتەر تۋدىراتىن جانە قايتادان قۇرىلۋدى قاجەت ەتەتىن اراب ەلدەرىنە الەۋمەتتىك ءتيىمدى ىقپال ەتەتىن جوبالاردى» جۇزەگە اسىرۋعا قارجى بولەدى. ول سونداي-اق، قىتايدىڭ ورتالىق ازيا، شىعىس افريكا جانە ءۇندى مۇحيتىن جەرورتا تەڭىزىمەن بايلانىستىراتىن پورتتار مەن تەمىرجولدار قۇرىلىسىمەن بىرگە ينفراقۇرىلىمداردى دامىتۋعا اتسالىسۋعا دايىن ەكەنىن دە اتاپ ءوتتى. ال، ءسۇريا، يوردانيا جانە يەمەن سەكىلدى ەلدەرگە گۋمانيتارلىق كومەك كورسەتۋگە بەيجىڭ 90,5 ملن دوللار جۇمساۋعا دايىن ەكەن. ماسەلەن، ۇستىمىزدەگى جىلدىڭ اقپان ايىندا قىتايدىڭ سۇرياداعى ەلشىسى شي تسيانتسزين ءسۇريانىڭ دامۋى مەن سوعىس سالدارىنان كەيىن قايتا قالىپتاسۋى ءۇشىن شام بيلىگىنە اۋقىمدى كومەك كورسەتۋ جوسپارى بار ەكەنىن دە جاريالاعان ەدى. قىتايدىڭ وسىنشاما كومەك كورسەتۋ نيەتتەرىنىڭ استارىندا قانداي ماقسات بار بولۋى مۇمكىن دەگەن ماسەلەدە پىكىرلەر سان الۋان. سونىڭ ىشىندە، قىتايلىقتاردىڭ بۇكىل الەمدە وزدەرىنىڭ اسكەري بەلسەندىلىكتەرىن ارتتىرۋدى كوبىرەك ماقسات تۇتاتىندىقتارى انىق. ماسەلەن، وسى قاڭتار ايىنداعى رەسمي دەرەكتەردەن بەلگىلى بولعانداي، ولار پاكىستاندا اسكەري-تەڭىز بازاسىن قۇرۋدى كوزدەگەن ەدى.

“The Qazaq Times”