فوتو: kamuoyu.org

2018 جىلدىڭ العاشقى التى ايىندا ءسۇريادا 4759 بەيبىت تۇرعىن قازا بولعان، ولاردىڭ اراسىندا 1104 بالا جانە 798 ايەل بار. ولاردىڭ باسىم كوپشىلىگى باشار اساد جاقتاستارىنىڭ قولىنان قازا بولعان. بۇل تۋرالى ادام قۇقىقتارى جونىندەگى ءسۇريا جەلىسىنىڭ ەسەبىندە حابارلانعان، - دەپ جازادى «evrensel.net» اگەنتتىگى (SNHR).

SNHR مالىمەتى بويىنشا، العاشقى جارتى جىلدىقتا 3056 ادام، ونىڭ ىشىندە 616 بالا جانە 507 ايەل باشار اساد رەجيمىنىڭ قۇربانىنا اينالعان. رەسەيدىڭ اۋە-عارىش كۇشتەرىنىڭ شابۋىلىنان 398 سۇريالىق، اتاپ ايتار بولساق 138 بالا مەن 79 ايەل كوز جۇمعان. ال، دايش تەرروريستەرى قولىنان 182 ادام، ونىڭ ىشىندە 43 بالا، 15 ايەل وپات بولعان. اقش جەتەكشىلىگىندەگى حالىقارالىق وداقتىڭ اۋە شابۋىلىنان 254 ازاماتتىق تۇلعا، ونىڭ ىشىندە 112 ايەل مەن 68 بالا قازا تاپقان. سونىمەن قاتار، قۇقىق قورعاۋشىلار 2018 جىلدىڭ ءبىرىنشى جارتىجىلدىعىندا «حايات تاحرير شام» توبىنىڭ شابۋىلدارىنان اراسىندا 16 بالا، 4 ايەل بار، بارلىعى 53 بەيبىت تۇرعان قازا تاپقانىن حابارلاپ وتىر. قالاي دەسەك تە، سۇرياداعى ازاماتتىق سوعىستى كەسىرىنەن جازىقسىز جاندار جاپا شەگىپ جاتقانى انىق جانە وسى سوعىسقا نۇكتە قويىلماي ولاردىڭ سانىنىڭ دا ارتا بەرەرى ءسوزسىز.

“The Qazaq Times”