ساندرا سانچەز بەن قىزى شەكارادا. فوتو: GETTY IMAGES/BBC.

وتكەن اپتادا اقش پرەزيدەنتى دونالد ترامپ شەكارادان زاڭسىز وتكەن ميگرانتتاردىڭ بالالارىن قوسا قاماۋ تۋرالى بۇيرىق بەرگەن. قۇراما شتاتتارى زاڭسىز كىرگەن ميگرانتتاردىڭ بالالارىن ارنايى ورىندارعا قاماۋعا العان. شەكارا قىزمەتىنىڭ بۇل ارەكەتى جانە ترامپتىڭ باستاماسى اقش پەن بىرقاتار باتىس ەلدەرىندە قاتتى سىنعا ۇشىرادى.

"امەريكاعا قوش كەلدىڭىز! فوتو: TIME/BBC.

وسى اپتا “Time” باسىلىمىنىڭ مۇقاباسىنا باسىلعان سۋرەت تە الەم نازارىن وزىنە اۋداردى. اتالعان باسىلىم يانەلا دەنيس اتتى كىشكەنتاي قىز بەن ترامپتىڭ سۋرەتىن بىرىكتىرىپ، «امەريكاعا قوش كەلدىڭىز!» دەگەن ماقالا جاريالاعان. يانەلا دەنيستىڭ بۇل سۋرەتى اناسى ساندرا سانچەزبەن بىرگە اقش شەكارا قىزمەتكەرلەرىنە ۇستالعان كەزىندە تۇسىرىلگەن. يانەلا مەن ترامپتىڭ سۋرەتى جاريالانا سالىسىمەن، ترامپ اكىمشىلىگىنىڭ قاتال ساياساتىنىڭ «سيمۆولى» رەتىندە، الەم ەلدەرىنىڭ ينتەرنەتىندە «حيت»-كە اينالىپ شىعا كەلدى. ءارى بۇل سۋرەتتى كورگەندەر «زاڭدىق كومەك ورتالىعى» اتتى ۇيىمنىڭ ەسەبىنە بىرنەشە كۇننىڭ ىشىندە 17 ملن اقش دوللارى قاراجات اۋدارعان.

دەنيستىڭ وتباسى. فوتو: FACEBOOK.

گوندۋراس مەملەكەتىنىڭ ازاماتى، زاڭسىز كەلگەن ميگرانت قىزدىڭ اكەسى دەنيس ۆالەرا اقش شەكاراشىلارى قىزىمنان ايىردى دەپ ايىپتادى. ۆالەرا اقش-قا جۇمىس ىستەۋ ماقساتىندا كەلگەن. ول شەكارادان ءوتۋ ءۇشىن امەريكالىق شەكارا قىزمەتكەرلەرىنە 6 اقش دوللارى كولەمىندە اقشا تولەگەنىن دە جاسىرعان جوق.

ساندرا سانچەزدى قىزىمەن بىرگە ۇستاعان امەريكالىق شەكارا قىزمەتكەرلەرى جۋرناليستەرگە جاۋاپ بەرىپ، سانچەز كوتەرىپ تۇرعان قىزىن ءوزىنىڭ سۇراۋى بويىنشا جەرگە قويعانىن، ءارى شەكارا قىزمەتكەرلەرى جىلاپ تۇرعان سابيگە قاراپ، «ءبارى دۇرىس پا؟» دەپ جاعدايىن سۇراعانىن، اناسى قىزىنىڭ شارشاعانىن جانە سۋ ىشكىسى كەلگەنىن عانا ايتتى دەگەن.  

ساندرا سانچەز كوتەرىپ تۇرعان قىزىن جەرگە قويىپ، شەكاراشىلارمەن سويلەسۋدە. فوتو: GETTY IMAGES/BBC.

اتالعان سۋرەتتى تانىمال فوتوگراف، پۋليتتسەر  سىيلىعىنىڭ يەگەرى جون مۋر 12 ماۋسىم كۇنى تەحاس شتاتىنىڭ شەكاراسىنا جاقىن ماكاللەن قالاسىندا تۇسىرگەن. ونىڭ ايتۋىنشا ساندرا سانچەز بەن قىزى ريو-گراندە وزەنى ارقىلى قايىقپەن زاڭسىز ءوتىپ كەلگەندە شەكاراشىلار جاعىنان ۇستالىپ قالعان.

شەكارادا قامالعان ميگرانت بالالار. فوتو: LEROY PENA/BBC.

ترامپ ۇكىمەتى اقش-قا زاڭسىز كىرەتىن ميگرانتتارعا قارسى قاتال جازانى ءساۋىر ايىنان باستادى. سودان بەرى مەكسيكا شەكاراسىنان زاڭسىز كىرگەندەردىڭ 2300-دەن استام بالالارى ارنايى ورىندارعا قامالعان. «Time» جۋرنالى يانەلانىڭ سۋرەتى اقش-داعى ميگراتسيا داۋىنىڭ «سيمۆولىنا» اينالعانىن ايتادى. بىراق، ماقالادا يانەلانىڭ اتا-اناسىنان ءبولىنىپ قالماعانىن ەسكەرتكەن.

“The Qazaq Times”