تۇركيا پرەزيدەنتى رەجەپ تايىپ ەردوعان.

رەجەپ تايىپ ەردوعان: «تۇركياداعى پرەزيدەنت جانە پارلامەنت سايلاۋىندا دەموكراتيا جەڭىسكە جەتتى» - دەپ مالىمدەدى.

ماۋسىم ايىنىڭ 24-ءى كۇنى وتكەن پرەزيدەنت جانە پارلامەنت سايلاۋىنان كەيىن تۇركيا باسشىسى رەجەپ تايىپ ەردوعان «ادىلەت جانە دامۋ» پارتياسى عيماراتىنىڭ بالكونىنان ەل حالقىنا ۇندەۋ جاسادى. ول وندا: «پرەزيدەنت جانە پارلامەنت سايلاۋىندا دەموكراتيا مەن ۇلت تاڭداۋى جەڭىسكە جەتتى. ءبىز ەرتەڭنەن باستاپ حالىققا بەرگەن ۋادەلەرىمىزدى ورىنداۋعا كىرىسەمىز. ءبىز پرەزيدەنتتىك باسقارۋ جۇيەسىنە وتۋگە دايىندىقتى اياقتادىق. پرەزيدەنت اكىمشىلىگى مەن مينيسترلەر كابينەتى تولىقتاي جاساقتالدى. ءبىز كۇندىز ءتۇنى جۇمىس ىستەپ، بۇكىل الەمگە ۇلگى كورسەتەتىن بولامىز» - دەپ مالىمدەدى.

ەستەرىڭىزگە سالايىق، ماۋسىم ايىنىڭ 24-ءى كۇنى تۇركيادا پرەزيدەنت جانە پارلامەنت سايلاۋى وتكەن. پرەزيدەنت سايلاۋىندا رەجەپ تايىپ ەردوعان حالىقتىڭ 52 پايىز داۋىسىن جيناپ جەڭىسكە جەتكەن. ال ونىڭ «ادىلەت جانە دامۋ» پارتياسى سايلاۋشىلاردىڭ 42 پايىز داۋىسىن جيناپ، پارلامەنتتەگى 293 ورىنعا يە بولعان.

“The Qazaq Times”