تۇركيا پرەزيدەنت سايلاۋىندا ەردوعان جەڭىسكە جەتتى

تۇركيا پرەزيدەنت سايلاۋىندا رەجەپ تايىپ ەردوعان جەڭىسكە جەتتى – دەپ حابارلايدى Anadolu اقپارات اگەنتتىگى.

تۇركيا سايلاۋ كەڭەسى باسشىسى سادي گيۋۆەننىڭ سوزىنشە، قازىرگى تاڭدا سايلاۋ بيۋللەتەنىنىڭ 97 پايىزى سانالعان. الدىنا الا ەسەپ بويىنشا، قازىردىڭ وزىندە رەجەپ تايىپ ەردوعان 52 پايىز داۋىس جيناپ تۇر. ياعني الداعى ۋاقىتتاعى بيۋللەتەن ساناعى قانداي ناتيجە كورسەتسە دە ەردوعاننىڭ قايتا پرەزيدەنت بولىپ سايلانۋىنا اسەر ەتپەيدى.

بۇدان بولەك پارلامەنت سايلاۋىندا دا ەردوعاننىڭ «ادىلەت جانە دامۋ» پارتياسى وزگەلەردەن وق بويى وزىپ شىقتى. ول سايلاۋشىلاردىڭ 42 پايىز داۋىسىن جيناپ، پارلامەنتتەگى 293 ورىنعا يە بولدى.

«ادىلەت جانە دامۋ» پارتياسىنان باسقا پارلامەنت سايلاۋىندا «ۇلتتىق قوزعالىس پارتياسى» 11,19 پايىز (49 ورىن), رەسپۋبليكالىق حالىقتىق پارتياسى 22,7 پايىز (146 ورىن) داۋىس جيناعان. ال «فەليسيتي» پارتياسى 1,4 پايىز داۋىس الىپ، پارلامەنتتەن ءبىر دە ءبىر ورىن الا الماعان.

“The Qazaq Times”