فوتو: انگەلا مەركەل

گەرمانيانىڭ ىشكى ىستەر ءمينيسترى حورست زەەحوفەر كانتسلەر مەركەلگە بوسقىندار ماسەلەسىن رەتتەۋ ءۇشىن ەكى اپتا مەرزىم بەرىپ، ۋلتيماتۋم قويدى، - دەپ حابارلايدى "Bloomberg" اگەنتتىگى.

ماۋسىم ايىنىڭ سوڭىنا دەيىن، ياعني ەكى اپتا ىشىندە مەركەل ەۋروداققا مۇشە وزگە ەلدەرمەن بىرگە بوسقىنداردى قابىلداۋدىڭ جالپى قاعيدالارى تۋرالى كەلىسىمشارت جاساسۋى كەرەك. ايتپەگەن جاعدايدا، زەەحوفەر ىشكى ىستەر ءمينيسترى رەتىندە زاڭسىز كوشى-قوندى رەتتەۋ سالاسىنداعى «باستى جوسپارىن» جۇزەگە اسىرۋعا نيەتتى.

ايتا كەتۋ كەرەك، ەكى ساياساتكەر دە بوسقىندار ماسەلەسىنە ەكى ءتۇرلى كوزقاراستا. زەەحوفەر بۇرىن ەو ەلدەرىندە تىركەلگەن بوسقىنداردىڭ ەلگە وتۋلەرىنە قارسى. ول شەكاراشىلارعا ونداي كوشىپ-قونۋشىلاردى گەرمانياعا وتكىزبەۋ ءۇشىن نۇسقاۋلىق بەرۋگە دايىن. ال، مەركەل بۇنداي ساياسات ەو ەلدەرىمەن اراداعى كەلىسپەۋشىلىكتى ودان سايىن ورشىتەدى دەگەن پىكىردە. ءارى ول بۇل ماسەلەدە ورتاق ساياسات ەنگىزىسى كەلەدى. ەندى، مەركەلگە ۋلتيماتۋم قويىلعاننان كەيىن، ول 28-29 ماۋسىم كۇندەرى وتەتىن ەو ءسامميتى بارىسىندا اتالعان ماسەلەنى بىرجاقتى ەتۋى ءتيىس.

نەگىزىنەن، زەەحوفەر گەرمانيا شەكاراسىنداعى باقىلاۋدى كۇشەيتۋدى دۇيسەنبى، 18 ماۋسىمنان باستاۋدى جوسپارلاعان ەدى. الايدا، جاڭا ۋلتيماتۋمعا بايلانىستى بۇل جوسپارى ەكى اپتاعا كەيىن شەگەرىلدى.

ماۋسىم ايىنان باسىنان ەۋروپا وداعىندا زاڭسىز كوشى-قون مەن بوسقىنداردى قابىلداۋ ماسەلەسىنە قاتىستى ساياسي الاۋىزدىق ءورشىپ تۇرعانى بارىمىزگە بەلگىلى. ەو-تىڭ بىرنەشە باستى ەلدەرى مەملەكەتارالىق دەڭگەيدە دە، ۇلتتىق دەڭگەيدە دە قاتاڭ سىنعا ۇشىراۋدا.

“The Qazaq Times”