فوتو: شەكاراداعى تۇرىك اسكەريلەرى

رەسمي انكارا مەن ۋاشينگتوننىڭ كەلىسىمى بويىنشا، تۇرىك اسكەريلەرى ءسۇريانىڭ مانبيدج قالاسىنا كىرگىزىلگەن. بۇل تۋرالى تۇركيانىڭ پرەمەر-ءمينيسترى بينال يىلدىرىم مالىمدەدى، - دەپ حابارلايدى "yeniakit.com.tr" اگەنتتىگى.

«بۇگىن ءبىز ءمانبيدجدى كۇرد جاساقتارىنان بوساتۋ ماقساتىندا اسكەري وپەراتسياعا كىرىستىك»، - دەگەن ول. اقش-تىڭ مەملەكەتتىك دەپارتامەنتى دە تۇركيامەن بىرگە كۇرد وتريادتارىن مانبيدجدەن شىعارۋ  كەستەسىن دايىنداعاندارىن مالىمدەدى. ايتا كەتەتىن جايت، كۇرد جاساقتارى 2016 جىلدىڭ ماۋسىم ايىندا وسى اۋداندى دايش ۇيىمىنان بوساتقان بولاتىن.

الايدا، ءبىر قىزىعى ءسۇريانىڭ مانبيدج قالاسىنىڭ اسكەري كەڭەس باسشىسى مۇحاممەد ءابۋ اديل اقپارات قۇرالدارىنا قالادا بىردە-ءبىر تۇرىك اسكەريلەرى جوق دەپ حابارلاعان. «ءبىز ءمانبيدجدىڭ اسكەري كەڭەس قىزمەتى رەتىندە حالىقارالىق وداقتارمەن كەلىسسوزدەر جۇرگىزدىك. ونىڭ ۇستىنە، كەشە حالىقارالىق وداقتار مەن تۇرىكتەر اراسىندا سوڭعى كەلىسسوزدەر جاسالىپ، بۇگىن تۇركيا تاراپىنان «ەفرات قالقانى» وپەراتسياسى قايتا باستالىپ كەتتى. الايدا، مانبيدجگە ءالى جەتپەدى»، - دەگەن ءابۋ اديل. ونىڭ سوزىنشە، تۇرىك بولىمشەلەرى اسكەري وپرەراتسيا جاسالعان ايماق شەكاراسىنا ورنالاستىرىلعان بولۋى مۇمكىن. الايدا، ولاردىڭ مانبيدجگە كىرەتىندەرىنە قاتىستى ەشقانداي كەلىسىمشارت جاسالماعان. ونىڭ وسى سوزىنە وراي، اقپارات قۇرالدارىنا ارنايى مالىمدەمە جاساعان تۇركيا سىرتقى ىستەر ءمينيسترى مەۆلۇت چاۆۋشوگلۋ:  "ەفرات قالقانى" جوباسىنا كىرەتىن ايماقتار مەن مانبيدج ايماعى اراسىنا اسكەرلەرىمىز كىرە باستادى. وسىدان كەيىن اقىرىنداپ مانبيدجگە كىرەدى. ماقساتىمىز — "كۇردتەردىڭ حالىقتىق قورعاۋ وتريادىنىڭ" (YPG)" باقىلاۋىنداعى بارلىق ايماقتان ولاردى شىعارا وتىرىپ، ايماقتى تۇراقتىلىقپەن قامتاماسىز ەتۋ", - دەدى.

ەستەرىڭىزگە سالا كەتەيىك، رەسمي انكارا مەن ۋاشينگتون وسى ايدىڭ باسىندا ءمانبيدجدى قاۋىپسىزدىكپەن جانە تۇراقتىلىقپەن قامتاماسىز ەتۋدى ءۇش كەزەڭمەن جۇزەگە اسىرۋعا كەلىسكەن ەدى. وسىعان بايلانىستى، العاشقى كەزەڭدە كۇرد جاساقتارىن مانبيدجدەن شىعارىلۋ جوسپارلانعان. ەكىنشى كەزەڭدە قالا 45 كۇن بويىنشا باقىلاۋعا الىنادى. ءۇشىنشى كەزەڭدە جەرگىلىكتى بيلىك قۇرىلادى.

 “The Qazaq Times”