وزبەكستاننىڭ سىرتقى ىستەر مينيسترلىگى اۋعانستان ۇكىمەتى مەن «تاليبان» تەررورلىق قوزعالىسى اراسىندا بەيبىت كەلىسسوزدەر جاسالۋى ءۇشىن دانەكەر بولۋعا دايىن ەكەندىگىن مالىمدەدى. بۇل تۋرالى، كەشە، 18 ماۋسىمدا وزبەكستاننىڭ سىرتقى ساياسات ۆەدوموستۆاسىنىڭ ءباسپاسوز قىزمەتى حابارلادى.

ۇستىمىزدەگى جىلدىڭ 27 ناۋرىزىندا تاشكەنتتە وتكەن اۋعانستان ماسەلەلەرى جونىندەگى حالىقارالىق كونفەرەنتسيادان كەيىن وزبەكستان رەسمي كابۋلمەن، سونىمەن قاتار اقش، قىتاي، رەسەي، وڭتۇستىك ازيا، ورتا جانە تاياۋ شىعىس ەلدەرىمەن كونسۋلتاتيۆتىك كەزدەسۋلەر وتكىزىپ، ناتيجەسىندە اۋعانستانداعى جاعدايعا بايلانىستى «تاليبان» قوزعالىسى وكىلدەرىمەن مامىلەلەسۋگە شەشىم شىعارعان. ەسكە سالا كەتسەك، 15 ماۋسىم كۇنى اۋعانستان بيلىگى مەن تالىبتەر 17 جىلدان بەرى العاش رەت ۋاقىتشا ءبىتىم جاساسقان ەدى. ەل پرەزيدەنتى اشراف گاني وسى كەلىسىمشارت ۇزاق جىلعى سوعىسقا نۇكتە قويادىدەپ ۇمىتتەنەتىنىن دە جاسىرمادى. الايدا، تۇركىمەنستانمەن شەكارادا دايش وكىلدەرى تاراپىنان جاسالعان شابۋىلعا بايلانىستى قايتا كوتەرىلگەن تالىبتەر، پرەزيدەنتتىڭ ۋاقىتشا ءبىتىم مەرزىمىن ۇزارتۋ ۇسىنىسىن قابىلدامايتىندىقتارىن مالىمدەگەن بولاتىن. ەندى، وزبەكستان بيلىگى دە بۇل ماسەلەگە ارالاسا باستادى.

 

“The Qazaq Times”