فوتو: حايباتۋللا احۋنزادا

«تاليبان» راديكالدى قوزعالىسىنىڭ جەتەكشىسى حايباتۋللا احۋنزادا «اۋعانستاندى قۇتقارۋدىڭ جالعىز جولى شەتەلدىك اسكەري كونتيگەنتتەردى ەلدەن شىعارۋ بولىپ تابىلادى»، - دەپ مالىمدەمە جاساعان. بۇل تۋرالى «ca-news.org» اگەنتتىگى حابارلايدى.

حايباتۋللا احۋنزادا اق ءۇي بيلىگىن اۋعانستانداعى كوپجىلدىق تەكەتىرەسكە نۇكتە قويۋ ءۇشىن بەيبىت كەلىسسوزدەردى باستاۋعا شاقىرعان. «ەگەر امەريكالىق  رەسمي تۇلعالار قاقتىعىستىڭ بەيبىت شەشىلۋىن شىنىمەن قالاسا، وندا ولار كەلىسسوزدەر ۇستەلىنە وتىرىپ، تىكەلەي ديالوگ باستاۋلارى كەرەك. امەريكالىق شەنەۋنىكتەردىڭ ەڭ ۇلكەن قاتەلىكتەرى ولار ءاربىر ماسەلەنى شەشۋدە قىرسىقتىق تانىتادى. الايدا، كۇش قولدانۋ ارقىلى ۇنەمى ويداعىداي ناتيجەگە جەتۋ مۇمكىن ەمەس»، - دەگەن احۋنزادا.

«اۋعانستاندى قۇتقارۋدىڭ جالعىز جولى اقش پەن وزگە دە ەلدەردىڭ ناتو-نىڭ اسكەري قيمىلدارىنا قاتىسۋشى اسكەري كونتيگەنتتەرىن شىعارۋ بولىپ تابىلادى»، دەگەن تاليبانداردىڭ ليدەرى شەتەلدىك اسكەريلەردىڭ كىرگىزىلۋىمەن اۋعانستاندا پايدا بولعان داعدارىس جاعدايىنىڭ تەك قانا بەيبىت كەلىسسوزدەر ارقىلى شەشىلەتىنىن دە ايتىپ ءوتتى. ونىڭ سوزىنشە، وسى قاقتىعىستىڭ قيىن سالدارىنان امەريكا مەن اۋعانستان حالقى كوبىرەك زارداپ شەگۋدە.

بۇعان دەيىن اۋعانستان پرەزيدەنتى اشراف گانيدىڭ رامازان ايى اياقتالعانشا، 12-19 ماۋسىم كۇندەرى ارالىعىندا تاليباندارعا قارسى بىرجاقتى ۋاقىتشا ءبىتىم جاريالاعانى تۋرالى جازعانبىز. وسىعان سايكەس، تاليباندار دا ءۇش كۇندىك ءبىتىم جاسايتىندىقتارىن، الايدا  وزدەرىنە قارسى قانداي دا ءبىر سىرتقى شابۋىل جاسالسا، "قاراپ قالمايتىندىقتارىن" حابارلاعان. ارتىنشا، اۋعانستاننىڭ تۇركىمەنستانمەن شەكاراسىندا تاليباندار مەن دايش اراسىندا قاقتىعىس ورىن الىپ، ۋاقىتشا ءبىتىم مەرزىمىنەن بۇرىن اياقتالعان بولاتىن. قاقتىعىس بارىسىندا اۋعانستاندىق 16 اسكەري قىزمەتكەر قازا تاۋىپ، تاعى بىرنەشە ادام اۋىر جارالاندى. اۋعانستان بيلىگى ەلدەگى جاعدايدىڭ بۇرىنعىدان دا شيەلەنىسىپ كەتكەنىن حابارلاعان ەدى. وسىعان وراي "تاليبان" قوزعالىسىنىڭ باسشىسى ح.احۋنزادا ەلدەگى قاقتىعىستىڭ اياقتالۋى اقش-تىڭ شەشىمىنە بايلانىستى دەپ مالىمدەدى.

“The Qazaq Times”