شىۇ ءماجىلىسى كەزىندە قىتاي باسشىسى پۋتينگە ەلدەن بولەك ءىلتيپات كورسەتتى

قىتايدىڭ چينداۋ قالاسىندا 9-10 ماۋسىم كۇندەرى وتكەن شانحاي ىنتىماقتاستىق ۇيىمىنىڭ ماجىلىسىنە وراي، ۇيىمعا مۇشە ەلدەردىڭ باسشىلارى قىتايعا ساپارلاي باردى. ماجىلىستەن بۇرىن جانە كەيىن قىتاي باسشىسىمەن جەكەلەگەن كەزدەسۋلەر بولدى. سونىڭ اراسىندا رەسەي پرەزيدەنتى ۆلاديمير پۋتين مەن قحر توراعاسى شي ءجينپيڭنىڭ كەزدەسۋى جۇرت نازارىن وزىنە كوبىرەك اۋداردى.

قىتاي باسىلىمدارى مەن رەسمي تەلەارنالارى تاراتقان حابارىنا قاراعاندا، وڭاشا كەزدەسكەن ەكى ليدەر قىتاي مەن رەسەيدىڭ كەڭ كولەمدەگى ىنتىماقتاستىعى جونىندە اقىلداسقان. اسىرەسە، قىتاي باسشىسى ەكى ەلدىڭ حالىقارالىق ماسەلەلەردە قويۋ قارىم-قاتىناس بىرلىگىن ورناتۋ كەرەك ەكەنىن، ال ءوزىنىڭ بۇل ءۇشىن ماسكەۋمەن بىرلەسە جۇمىس جاساۋعا دايىن ەكەنىن كوبىرەك ورتاعا قويعان.

بۇل رەت شىۇ ماجىلىسىنە بارعان مۇشە ەلدەردىڭ ليدەرلەرى اراسىندا شي ءجينپيڭنىڭ ايرىقشا ءىلتيپاتى مەن قوناقجايلىعىن رەسەي پرەزيدەنتى كوردى. ەكەۋ ارا كەزدەسۋلەر رەسمي جانە بەيرەسمي جاعدايلاردا دا وتكىزىلدى. «الا قويدى بولە قىرققان» مۇنداي ساياسي ويىندار، قىتايدىڭ اتالمىش ۇيىمداعى تاعى ءبىر الپاۋىت ەلدى سوزىنە كوندىرۋگە تىرىسۋ ارەكەتىنە كوبىرەك ۇقسادى.

ءۇندىستان مەن تايۋان (تايۆان) باسىلىمدارى قىتاي باسشىسىنىڭ بۇل ارەكەتىنە ەكى جاقتى باعا بەردى. ايتالىق، بىرىنشىدەن پۋتينگە كورسەتىلگەن ايرىقشا قۇرمەت قىتاي باسشىسىنىڭ ەل ىشىندەگى جانە ۇيىمداعى بەدەلىن ارتتىرا تۇسسە، ەكىنشىدەن،  وڭتۇستىك قىتاي تەڭىزى، سولتۇستىك كورەيا ماسەلەسى، يران يادرولىق ماسەلەسى، ءۇندىستان-قىتاي قارىم-قاتىناسى، اقش-قىتاي قايشىلىعى ماسەلەسىندە سىرتقى ەلدەرگە دەگەن ءدوڭ ايبات كورسەتۋى دەپ باعالاعان.

حابارعا قاراعاندا رەسەي مەن قىتاي باسشىسىنىڭ وڭاشا كەزدەسۋىندە، كورەي تۇبەگى جانە يران يادرولىق ماسەلەلەرى دە ءسوز بولعان. بۇل ەكى ماسەلەدە دە قىتاي مەن رەسەيدىڭ ۇلەس سالماعى بار. قىتاي-رەسەي اراسىندا پىكىر بىرلىگىنە كەلىپ جاتسا، اتالعان ماسەلەلەرگە قاتىسى بار وزگە تاراپتار ءۇشىن ۇلكەن قارسى كۇش بولاتىنى انىق.

“The Qazaq Times”