«ۇلكەن جەتىلىكتىڭ» ءسامميتى ءوزارا الاۋىزدىقتى رەتتەي الا ما؟

بۇگىن كانادادا «ۇلكەن جەتىلىك» ەلدەرىنىڭ ءسامميتى باستالادى. «ۇلكەن جەتىلىك» قۇرامىنداعى ەكونوميكالىق تۇرعىدان دامىعان التى الپاۋىت ەل (امەريكا، كانادا، جاپونيا، ۇلىبريتانيا، فرانتسيا، گەرمانيا، يتاليا) مەن اقش اراسىنداعى تەرەڭدەي تۇسكەن كەلىسپەۋشىلىك اقىرى اتالعان ءسامميتتىڭ وتكىزىلۋىنە سەبەپ بولىپ وتىر. ەكى كۇنگە سوزىلاتىن وسى جيىن بارىسىندا ۆاشينگتوننىڭ ەۋروداق ەلدەرىنەن، كانادادان جانە مەكسيكادان شىعارىلاتىن بولات پەن اليۋمينيگە كەدەن سالىعىن ەنگىزۋى كەڭىنەن تالقىلانباق.

الەمدىك ەكونوميستتەر ۆاشينگتون تاراپىنان جاسالعان وسى قادامعا "باتىس ەلدەرى اراسىنداعى ساۋدا سوعىسىنىڭ باسى" دەپ باعا بەرۋدە. بۇعان دەيىن دە جازىپ وتكەنىمىزدەي، فرانتسيا پرەزيدەنتى ەممانۋەل ماكرون اتالعان ەلدەردى امەريكا بيلىگىنە قارسى ۇيىمداسۋعا شاقىرىپ ءارى اقش پرەزيدەنتىنىڭ اتالعان التى ەل تاراپىنان شەتتەتىلۋى مۇمكىن ەكەنىن مالىمدەگەن ەدى. ەندى، الدا كۇتىپ تۇرعان وسى سامميت اقش پەن "ۇلكەن جەتىلىك" اراسىندا تۋىنداعان الاۋىزدىقتى شەشە الا ما دەگەن كوپ ساۋال تۋىنداۋدا.

اقش پرەزيدەنتى ءوز تاراپىنان ماكرون مەن كانادا پرەمەرى دجاستين تريۋدونى «ولار امەريكادان يمپورتتالاتىن تاۋارلارعا سالىق سالدى ءارى ساۋدا قاتىناسىندا وزگە دە كەدەرگىلەر جاساۋدا» ، - دەپ سىناعان بولاتىن. سونداي-اق، ول: «ەۋروداق اقش-پەن ساۋدا قاتىناسىندا 151 ميلليارد كولەمىندە پايدا كورەدى. ال وتتاۆا ءوز نارىعىنا امەريكالىق فەرمەرلەر مەن وزگە دە وندىرۋشىلەردىڭ ونىمدەرىن كىرىزبەي وتىر»، - دەگەن ەدى.

سونىمەن قاتار، اتالعان سامميت قارساڭىندا كۆەبەك-ءسيتيدىڭ ورتالىعىندا بۇكىل دۇنيەجۇزىنەن جينالعان انتيجاھاندانۋ بەلسەندىلەرىنىڭ قارسىلىق ناۋقانى جوسپارلانۋدا. قازىر وندا قاۋىپسىزدىك شارالارى كۇشەيتىلگەن. ارنايى كولىكتەرمەن قورشاۋعا الىنعان كوپتەگەن كوشەلەر ءتارتىپ ساقشىلارى مەن تىكۇشاقتاردىڭ قاتاڭ باقىلاۋىندا.

«ۇلكەن جەتىلىك» ەلدەرىنىڭ اتالعان ءسامميتى بۇگىن، ياعني 8-ماۋسىم كۇنى جەرگىلىكتى ساعات 12:00-دە (استانا ۋاقىتىمەن 22:00) باستالىپ، ەكى كۇنگە جالعاسادى دەپ جوسپارلانۋدا.

“The Qazaq Times”