اقش يرانعا باعىتتاعان سانكتسياسىندا ءوز وداقتاستارىن دا ايامايتىنىن ەسكەرتتى

اقش لاۋازىمدىلارىنىڭ سوزىنە قاراعاندا، قۇراما شتاتتىڭ وداقتاستارى مەن سەرىكتەس ەلدەرى يرانمەن بولعان ساۋدا بايلانىستارىن جالعاستىرا بەرەتىن بولسا، ۋاشينگتون جاعىنا قىسىمدارعا تاپ بولماق. سونىڭ ىشىندە سانكتسيا ىقتيمالدىعى دا بار. بۇل تۋرالى اقش-تىڭ VOA اگەنتتىگى حابارلادى.

سەيسەنبى كۇنى اقش قارجى مينيسترلىگى ەسكەرتۋ جاساپ، يران قۇرعاق كومپانيالاردى جانە زاڭسىز قارجىلاندىرۋ ارقىلى ءوزىنىڭ ارانداتۋ ارەكەتتەرىن جالعاستىرىپ كەلە جاتقانىن، 2015 جىلى يادرولىق كەلىسىم جاسالعاننان كەيىن دە بۇل ارەكەتتەرىن تەجەمەگەنىن ايتتى. اقش لاۋازىمدىلارىنىڭ ايتۋىنشا، يراننىڭ بۇل ارەكەتتەرى «شەكتەن شىقتى».

قارجى مينيسترىنە قاراستى تەرروريزمگە قارسى جانە قارجى باقىلاۋ دەپارتامەنتىنىڭ ديرەكتورى ماندەلك سوزىندە: «يران رەجيمى كومپانيالاردى الداپ، قارجى جۇيەسىن تۇراقتاندىرۋعا كەدەرگى كەلتىرەدى جانە ءسىزدىڭ كومپانياڭىزدى جانە مەحانيزمىن قاتاڭ سانكتسيالارعا ۇشىراتادى. يران رەجيمى تەرروريزمدى، ادام قۇقىقتارىن بۇزۋدى جانە حيزباللا، حاماس جانە حۋسەين سەكىلدى تەرروريستىك توپتاردى قولداۋ ءۇشىن وسى زاڭسىز قاراجاتتارىن پايدالانادى»، – دەپ ايىپتادى.

وتكەن ايدا اقش پرەزيدەنتى دونالد ترامپ 6 ەل قول قويعان يران يادرولىق كەلىسىمىنەن باس تارتىپ، كەلىسىمدى «بىرجاقتى مۇددەلەرگە باعىتتالعان ناشار كەلىسىم» دەپ باعالاعان. ول جانە يراننىڭ يادرولىق ارەكەتتەرىنە قارسى بارلىق سانكتسيالاردى قالپىنا كەلتىرۋگە بۇيرىق بەرگەن. دەگەنمەن، ەۋروپالىق ەلدەر يران اتالعان كەلىسىمدى اتقارىپ وتىر دەپ قاراپ، كەلىسىمنەن باس تارتپايتىندارىن جەتكىزگەن.

اقش قارجى دەپارتامەنتى قۇراما شتاتتىڭ وداقتاستارىن قارجى جۇيەلەرىن بەكەمدەۋگە شاقىردى. سونداي-اق، امەريكالىق جانە وعان سەرىكتەس ەلدەردىڭ كومپانيالارىنا ەسكەرتۋ جاساپ، اقش-تىڭ قاتاڭ سانكتسياسىنا ۇشىراماس ءۇشىن تاياۋ شىعىستا يراننىڭ زاڭسىز قارجىلارىنان اۋلاق بولۋدى ەسكەرتتى.

“The Qazaq Times”