ۇلىبريتانيا رەسەيلىك قالتالىلاردىڭ تابىس كوزىن تەكسەرۋدە. فوتو: Daily Mail.

ۇلىبريتانيانىڭ Sunday Times باسىلىمى، رەسەيلىك باي-ماناپتار ءۇشىن ۇلىبريتانيا تابىس كوزى بولىپ وتىرعانىن ايتادى. اتالعان باسىلىم قىلمىسقا قارسى بارلاۋ اگەنتتىگىنىڭ 140-تان استام قالتالىنىڭ تابىس كوزدەرىنە جاساعان تەكسەرۋ ناتيجەسىنە سۇيەنە وتىرىپ وسىنداي قورىتىندى جاساعان. Sunday Times باسىلىمىنا بىرقاتار مالىمەتتى اتالعان اگەنتتىكتىڭ ەكونوميكالىق جانە كيبەر-قىلمىستىق ىستەر جونىندەگى توپتىڭ جەتەكشىسى دونالد تۋن بەرگەن.

باسىلىمنىڭ حابارىنا قاراعاندا، تەكسەرۋگە الىنعان 140-تان استام ادامنىڭ باسىم كوبى رەسەيلىك نەمەسە رەسەيمەن قاتىسى بار قالتالى بايلار. تەكسەرۋ توبىنىڭ جەتەكشىسى سوزىندە: «ۇلىبريتانيادا بولعان قاستاندىق وقيعاسى ءبىزدىڭ تەكسەرۋ ءىسىمىزدى تەزدەتۋگە سەبەپ بولدى. كوررۋپتسياعا باتقان رەسەيلىك قالتالىلار مەن تانىمال ادامدارعا تەكسەرۋ جۇرگىزدىك»، – دەيدى.

بيىل قاڭتار ايىندا ۇلىبريتانيادا «كەلىپ شىعۋى بەلگىسىز بايلىققا وردەر» زاڭى كۇشىنە ەندى. ەگەر تابىسكەر بايلىعىنىڭ قايدان كەلگەنىن دالەلدەپ كورسەتە الماسا، وندا اتالعان زاڭ بويىنشا تابىسى 50 مىڭ فۋنتتان اسقاننان كەيىن اقشاسىن بۇعاتتالادى جانە تەكسەرۋدى قابىلدايتىن بولادى. دونالد تۋن كەزەكتى تەكسەرىستىڭ جەمقورلىققا باتقان ەليتا جانە زاڭسىز جولمەن تابىس تاپقان قالتالىلارعا قاراتىلعانىن اشىق ايتتى.

رەسەيلىك بۇرىنعى بارلاۋ قىزمەتكەرى اعىلشىن جەرىندە قاستاندىققا ۇشىراعاننان كەيىن، ۇلىبريتانيا ۇكىمەتى ءوز ەلىندەگى رەسەيمەن قاتىسى بار ادامدارعا تەكسەرىستى كۇشەيتتى. وسى وقيعادان كەيىن پرەمەر-مينيستر تەرەزا مەي ەلدىڭ ينۆەستورلارعا ۆيزا بەرۋ جۇيەسىن قايتا تەكسەرىپ قاراۋدى تاپسىردى. سول رەت 700-دەي رەسەيلىك ينۆەستور قامتىلعاگ بولاتىن.

ال، مامىر ايىنا كەلگەندە، ۇلىبريتانيا پارلامەنت پالاتاسىندا «ماسكەۋ التىنى نەمەسە ۇلىبريتانياداعى رەسەي كوررۋپتسياسى» دەگەن بايانداما جاسالدى. ونى «بريتانياداعى رەسەيلىك ارام اقشا» دەپ اتاپ، ۇلتتىق قاۋىپسىزدىككە قاتەر توندىرەدى دەپ ۇيعاردى. بۇدان كەيىن اعىلشىن بيلىگى رەسەيگە قارسى تۇراتىن جۇيە جاساپ شىعۋ جانە پۋتين مەن ونىڭ اينالاسىنا ساياسي-ەكونوميكالىق قىسىم ءتۇسىرۋ كەرەك دەپ تاپتى.

اعىلشىن ۇكىمەتىندەگى بۇل جاعدايدان كەيىن سول ەلدەگى رەسەيلىك ينۆەستورلاردىڭ ءجۇرىس-تۇرىسى، ۆيزا الۋى، تابىس تابۋى قيىنداي ءتۇستى. قورىتا ايتقاندا، رەسەيلىك ينۆەستورلار اعىلشىن جەرىندە ينۆەستيتسيا سالۋ ءۇشىن تابىس كوزىن اشىق كورسەتۋگە مىندەتتى. تابىس كوزىنىڭ زاڭدى ەكەنىن دالەلدەي الماعان ورىس قالتالىلارىنا اعىلشىن ارالىنان تابىس تابۋ مۇمكىن بولماي قالدى.

 “The Qazaq Times”