Wlıbritaniya Reseylik qaltalılardıñ tabıs közin tekserude. Foto: Daily Mail.

Wlıbritaniyanıñ Sunday Times basılımı, reseylik bay-manaptar üşin Wlıbritaniya tabıs közi bolıp otırğanın aytadı. Atalğan basılım Qılmısqa qarsı barlau agenttiginiñ 140-tan astam qaltalınıñ tabıs közderine jasağan tekseru nätijesine süyene otırıp osınday qorıtındı jasağan. Sunday Times basılımına birqatar mälimetti atalğan agenttiktiñ Ekonomikalıq jäne kiber-qılmıstıq ister jönindegi toptıñ jetekşisi Donal'd Tun bergen.

Basılımnıñ habarına qarağanda, tekseruge alınğan 140-tan astam adamnıñ basım köbi reseylik nemese Reseymen qatısı bar qaltalı baylar. Tekseru tobınıñ jetekşisi sözinde: «Wlıbritaniyada bolğan qastandıq oqiğası bizdiñ tekseru isimizdi tezdetuge sebep boldı. Korrupciyağa batqan reseylik qaltalılar men tanımal adamdarğa tekseru jürgizdik», – deydi.

Biıl qañtar ayında Wlıbritaniyada «Kelip şığuı belgisiz baylıqqa order» zañı küşine endi. Eger tabısker baylığınıñ qaydan kelgenin däleldep körsete almasa, onda atalğan zañ boyınşa tabısı 50 mıñ funttan asqannan keyin aqşasın bwğattaladı jäne tekserudi qabıldaytın boladı. Donal'd Tun kezekti tekseristiñ jemqorlıqqa batqan elita jäne zañsız jolmen tabıs tapqan qaltalılarğa qaratılğanın aşıq ayttı.

Reseylik bwrınğı barlau qızmetkeri ağılşın jerinde qastandıqqa wşırağannan keyin, Wlıbritaniya ükimeti öz elindegi Reseymen qatısı bar adamdarğa tekseristi küşeytti. Osı oqiğadan keyin prem'er-ministr Tereza Mey eldiñ investorlarğa viza beru jüyesin qayta tekserip qaraudı tapsırdı. Sol ret 700-dey reseylik investor qamtılğag bolatın.

Al, mamır ayına kelgende, Wlıbritaniya parlament palatasında «Mäskeu altını nemese Wlıbritaniyadağı Resey korrupciyası» degen bayandama jasaldı. Onı «Britaniyadağı reseylik aram aqşa» dep atap, wlttıq qauipsizdikke qater töndiredi dep wyğardı. Bwdan keyin ağılşın biligi Reseyge qarsı twratın jüye jasap şığu jäne Putin men onıñ aynalasına sayasi-ekonomikalıq qısım tüsiru kerek dep taptı.

Ağılşın ükimetindegi bwl jağdaydan keyin sol eldegi Reseylik investorlardıñ jüris-twrısı, viza aluı, tabıs tabuı qiınday tüsti. Qorıta aytqanda, Reseylik investorlar ağılşın jerinde investiciya salu üşin tabıs közin aşıq körsetuge mindetti. Tabıs köziniñ zañdı ekenin däleldey almağan orıs qaltalılarına ağılşın aralınan tabıs tabu mümkin bolmay qaldı.

 “The Qazaq Times”