اقش قورعانىس ءمينيسترى: قىتايدىڭ تۇپكى ماقساتى الاڭداۋشىلىق تۋعىزادى

بۇگىن سينگاپۋردا وتكەن ازيا ەلدەرىنىڭ قورعانىس وكىلدەرىنىڭ «Shangri-La Dialogue» اتتى فورۋمىندا ءسوز العان اقش قورعانىس ءمينيسترى جەيمس مەتتيس قىتايدى تاعى دا قاتاڭ سىنعا الدى. ول سوزىندە قىتاي ۇكىمەتى وڭتۇستىك قىتاي تەڭىزىندەگى تالاستاعى ارالداردىڭ كەيبىرەۋىن اسكەري تۇراقتارعا اينالدىرىپ، كورشى ەلدەردى قورقىتۋ مەن تەرريتوريانىڭ قىتايعا ءتان ەكەنىنە ماجبۇرلەۋ ءۇشىن ميليتاريزاتسيا جاساعانىن ايتتى.

اقش قورعانىس ءمينيسترلى سوزىندە اقش-تىڭ ءۇندى مۇحيتى مەن تىنىق مۇحيت ايماعىنىڭ اشىقتىعى مەن ەركىندىگىن قورعايتىندىعىن اتاپ ءوتتى. مەتتيس سوزىندە: «قىتايدىڭ وڭتۇستىك قىتاي تەڭىزىندە جاساپ جاتقان ارەكەتتەرى ءبىزدىڭ بۇل ستراتەگيامىزعا قاراما-قايشى. بۇل قىتايدىڭ تۇپكى ماقساتى تۋرالى كۇدىكتى ويلارعا جەتەلەيتىن ارەكەت»، – دەپ باعالادى.

پەنتاگون باسشىسى قىتايدىڭ اتالعان تەڭىزدەگى ۆەتنام جاعالاۋلارىنا جاقىن شيشا ارالدارىندا جەرۇستى زىمىراندارىن، باسقارىلمالى زىمىران جۇيەلەرىن جانە كەمەلەردى باقىلاۋ قۇرىلعىلارىن ورنالاستىرعانىن، سونداي-اق، سوڭعى كەزدە بۇل ارالعا ستراتەگيالىق بومبالاۋشى ۇشاق قوندىرعانىن اتاپ ءوتتى. «قىتاي تارابى تەرىستەگەنىمەن، بۇل قارۋ-جاراق جانە اسكەري قۇرىلعىلاردىڭ ورناتىلۋى، بەيجىڭ بيلىگىنىڭ اينالاسىنداعى ەلدەردى قورقىتۋ مەن ماجبۇرلەۋگە باعىتتالعان ارەكەتى ەكەنىن دالەلدەيدى»، – دەپ ايىپتادى جەيمس مەتتيس.

قازىر كۇللى الەم اقش پەن سولتۇستىك كورەيا باسشىلارىنىڭ سامميتىنە كوز تىگىپ وتىرعانىمەن، كەزەكتى «Shangri-La Dialogue» قاۋىپسىزدىك فورۋمىندا ازيا ءوڭىرىنىڭ ۇزاق مەرزىمدىك قاۋىپسىزدىگى جانە قىتايدىڭ ارتا تۇسكەن ميليتاريزاتسيا قاۋپى باستى تاقىرىپ ەتىلدى. قىتاي مەن وڭتۇستىك قىتاي تەڭىزىنە شەكتەسەتىن ازيا ەلدەرى اراسىنداعى، سونىمەن قاتار قىتاي مەن اقش قارىم-قاتىناسىنىڭ تۇپكىلىكتى دەڭگەيدە قايشىلىققا ۇلاسقانىن انىق كورسەتتى.

“The Qazaq Times”