فوتو: حامزا بەن لادەن

الەمدەگى ءنومىرى ءبىرىنشى تەرروريست بولىپ سانالاتىن ۋساما بەن لادەننىڭ مۇراگەرى حامزا حالىقارالىق تەررورلىق ورتاعا ورالىپ، ساۋد-ارابياسىنداعى مونارحيانى جويۋعا دايىن. بۇل تۋرالى liberation.fr حابارلايدى.

سونىمەن قاتار، اتالعان اگەنتتىك جاريالاعان حاباردا «ءال-كايدا» جەتەكشىلەرىنىڭ ءبىرى باتىستان كەك الىپ، يسلامنىڭ كيەلى جەرلەرىن باسىپ الۋدى جوسپارلاۋدا، دەپ جازىلعان.

حامزا — ۋساما بەن لادەننىڭ جيىرماعا جۋىق  ۇلدارىنىڭ اراسىنداعى ەڭ سۇيىكتىسى. ول الەمدىك دەڭگەيدەگى ءنومىرى ءبىرىنشى تەرروريست سانالعان بەن لادەننىڭ وزگە بالالارىنان ءوزىنىڭ دىنگە جاقىندىعىمەن ەرەكشەلەندى. بىلەتىندەردىڭ ايتۋىنشا، بەن لادەن ونى كىشكەنتاي كەزىنەن باستاپ ناسيحاتتىق ماقساتتا پايدالانعان.

ماسەلەن، توعىز جاسىندا حامزا «ءال-كايدانىڭ» كوپتەگەن بەينە-روليكتەرىنە تۇسكەن. وندا ول وزگە ءدىن وكىلدەرىمەن اراداعى سوعىسقا ارنالعان ولەڭدەردى ناقىشىنا كەلتىرە وقىعان. سونىمەن قاتار، امەريكانىڭ اۋعانستانعا شابۋىلى كەزىندە ورتەنگەن ۇشاقتاردىڭ فونىندا سۋرەتكە تۇسكەن. ول بەنازير بحۋتتونى ءولتىرۋدى جوسپارلاعان پاكىستانداعى تەررورلىق استىرتىن ارەكەتكە دە قاتىسقان.

ال، الەمدىك ساحنادا دايش پايدا بولعان كەزدە حامزا اقپاراتتىق الاڭنان كورىنبەي كەتتى. ونىڭ قايتىس بولعاندىعى تۋرالى قاۋەسەت تاراپ، الايدا بىرنەشە جىلدان كەيىن ول «ءال-كايدا» ۇيىمىنىڭ باستى بەلەندىلەرى رەتىندە قايتا ورالدى. حامزانىڭ قايتادان ورالۋى ساۋد-ارابياسىنا ۇلكەن قاۋىپ تۋدىردى. وتكەن جىلدىڭ قىركۇيەك ايىندا ول تايپالاردى وسى ەلدىڭ ۇكىمەتىن قۇلاتۋعا شاقىرعان ەدى.

ءار-رياد جۇرگىزىپ وتىرعان كەيبىر رەفورمالار كوپتەگەن نارازى توپتىڭ اشۋىنا تيگەن. ال، حامزا وسىنى پايدالانۋدى كوزدەيدى، دەيدى ساراپشىلار. وسى ورايدا، رەسەيلىك پروفەسسور گريگوري كوساچ بەن لادەننىڭ ۇلىنىڭ تايپالارعا جاساعان ۇندەۋىن تاپقىر شەشىمگە بالايدى. الايدا ول، ءوزارا مەملەكەتارالىق ەگەسكە قاراماستان، ساۋديالىق تايپالار كىشى بەن لادەننىڭ سوزىنە ەرمەيدى دەپ ۇمىتتەنەتىنىن جاسىرمادى. ال، الەمدىك ساياسي تەحنولوگتار ورتالىعى تايپالار اراسىنداعى قاقتىعىس راسىمەن دە ساۋد-ارابياسى ءۇشىن قاۋىپتى بولماق دەپ حابارلادى.

مامانداردىڭ پايىمداۋىنشا، دايش-تىڭ ىدىراۋى مەن حامزا بەن لادەننىڭ ساياسي ساحناعا قايتا ورالۋى سياقتى وقيعالاردىڭ تۇسپا-تۇس كەلۋى «ءال-كايداعا» ەكىنشى سەرپىن بەرۋى مۇمكىن. اۋىزدىقتالعان دايش-تىقتار حامزانى وزدەرىنىڭ جاڭا ليدەرلەرى رەتىندە كورىپ، ونى ءوز تاپتارىنا قوسۋعا تىرىسۋلارى ىقتيمال.

“The Qazaq Times”