رەسەيلىك وپپوزيتسيونەر جۋرناليست اركادي بەبچەنكو. فوتو: نوۆوە ۆرەميا.

كيەۆتە رەسەيلىك وپپوزيتسيونەر جۋرناليست، جازۋشى ءارى بلوگەر اركادي بابچەنكونىڭ ولىمىنە قاتىستى ءتۇرلى جورامالدار ايتىلۋدا. مالىمەتتەرگە قاراعاندا، قاستاندىق جاساۋشى بابچەنكونى كوپ قاباتتى تۇرعىن ءۇيدىڭ كىرە-بەرىسىندە كۇتىپ تۇرعان. كەيىن، اركادي پاتەرىنىڭ ەسىگىن اشۋعا قامدانعاندا تۋ سىرتىنان بىرنەشە رەت اتقان. كيەۆ پوليتسياسى قىلمىس كۇماندىسىنىڭ جاي سىزباداعى پورترەتىن تاراتتى. ولار مارقۇمدى ناقتى كىمنىڭ ولتىرگەنىن تەك بابچەنكونىڭ ايەلى عانا ايتىپ بەرە الادى دەيدى. قازىر ونىڭ كۋالىك بەرۋى نەگىزىندە تەكسەرۋ ىستەرى جۇرگىزىلۋدە.

ۋكراينا پوليتسياسى تاراتقان قىلمىس كۇماندىسىنىڭ پورترەتى. فوتو: مۆس ۋكراїني تۆيتتەر پاراقشاسىنان.

"BBC" حابارىنا قاراعاندا، حالىقارالىق ۇيىمدار بۇل ءىستى بۇگە-شىگەسىنە دەيىن تاپتىشتەي تەكسەرۋدى تالاپ ەتۋدە. بابچەنكونىڭ ارىپتەستەرى «ساياسي سەبەپپەن ءولتىرىلدى» دەگەن پىكىردە جانە وزگە جورامالداردىڭ ءبارىن تەرىسكە شىعاردى. الەۋمەتتىك جەلىلەردە دە بۇل تۋرالى قىزۋ تالقى ورىستەگەن. سونىڭ كوبى بابچەنكونىڭ ولىمىنە رەسەي بيلىگىن ايىپتى دەپ سانايدى. الايدا، قىلمىستى كىمنىڭ جۇزەگە اسىرعانى تۋرالى قازىرگە دەيىن يلاندىرارلىق دەرەك جوق.

«دوجد» كانالىنىڭ حابارىندا، «نوۆايا گازەتا» باسىلىمىنىڭ (بابچەنكو قىزمەت ەتكەن باسىلىم) رەداكتورى دميتري مۋراتوۆ ونىڭ ءولىمى ساياسي ۇستانىمىنا تىكەلەي قاتىستى دەگەن پىكىرىن ءبىلدىردى. مۋراتوۆ سۇحباتىندا: «وعان جازۋشىلىق، جۋرناليستىك ىسكەرلىگى ءۇشىن قاستاندىق جاسالدى. ودان وزگە مەندە كۇمان جوق. مۇنى كىم ىستەدى، ونى ازىرگە بىلمەيمىز. بىراق ءبىز وسى ءىستىڭ سوڭىنا  تۇسەتىن بولامىز»، – دەدى. رەداكتوردىڭ ايتۋىنشا، باكبچەنكو اقشا جانە بيزنەس ماسەلەلەرىنەن ءوزىن اۋلاق ۇستاعانىمەن، اسكەري-ساياسي سىر-قۇپيالارعا كەلگەندە ەكىلەنبەستەن كىرىسىپ، باتىل پوزيتسياسىن كورسەتەتىن. ءارى، وسىنداي تاقىرىپتاردا ول قاشاندا قۇرباندىق بولعان، زارداپ شەككەندەر تارابىندا تۇرعانىن ايتادى.

ريا نوۆوستي اگەنتتىگى «موسكوۆسكي كومسومولەتس» باسىلىمىنىڭ باس رەداكتورى پاۆەل گۋسەۆتىڭ پىكىرىن جاريا ەتكەن. گۋسەۆ بابچەنكونىڭ مەملەكەتتىك باسىلىمداردا اسكەري جۋرناليست بولىپ ىستەگەننەن ايتىپ، ونىڭ جوعارى كاسىپتىك قابىلەتكە يە بولعانىن مالىمدەگەن. دەگەنمەن ول سوڭعى جىلدارى رەسەي-ۋكراينا قايشىلىعىنا بايلانىستى بابچەنكومەن ۇقساماعان كوزقاراستا بولىنگەنىن مويىندادى. گۋسەۆتىڭ ويىنشا بۇل وقيعانىڭ «رەسەي ارنايى قىزمەتىمەن قاتىسى جوق».

الايدا، گۋسەۆتىڭ بۇرىنعى ورىنباسارى ايدەر مۋجداباەۆتىڭ پىكىرى وعان قايشى. مۋجداباەۆ قىرىمدىق تاتار، قىرىمدى رەسەي اننەكتسيالارعاننان كەيىن ماسكەۋدەن كيەۆكە قونىس اۋدارعان. باكچەنكونىڭ ومىردەگى جاقىن ارالاسقان دوسى. ول بابچەنكونىڭ ولىمىنە رەسەي ارنايى قىزمەتىنىڭ قاتىسى بار ەكەنىن ايتادى.

شەكاراسىز جۋرناليستەر حالىقارالىق ۇيىمى، جۋرناليستەردى قورعاۋ كوميتەتى بۇل ءىستى «جان تۇرشىگەرلىك وقيعا» دەپ باعالاعان ءارى كيەۆ بيلىگىنەن ءىستى تەز ارادا انىقتاپ، قىلمىسكەرلەردى تابۋدى تالاپ ەتكەن.  

 “The Qazaq Times”