پولشادا اقش اسكەري بازاسى قۇرىلماق. فوتو: Strategic Culture Foundation.

پولشا تارابى رەسەيدىڭ وڭىردەگى اسكەري قاتەرىنەن ساقتانۋ ماقساتىندا، اقش-تان مىڭداعان امەريكالىق اسكەرلەردى قامتيتىن اسكەري بازا قۇرۋدى سۇراۋدا. پولشانىڭ قورعانىس ءمينيسترى برەجاك كەشە جاساعان مالىمدەمەسىندە، اقش-تىڭ پولشادا تۇراقتى اسكەري بازاسى مەن اسكەرلەرىن ەنگىزۋ تۋرالى قۇراما شتات لاۋازىمدىلارىمەن كەلىسسوز جۇرگىزگەنىن ايتتى. بۇل تۋرالى VOA News حابارلاپ وتىر.

2014 جىلى رەسەي قىرىمدى ۋكراينادان ءبولىپ العاننان كەيىن، پولشا تارابى ءوزىنىڭ قاۋىپسىزدىگىنەن الاڭداي باستادى. برەجاك كەشە پولشاداعى مەملەكەتتىك راديوعا بەرگەن سۇحباتىندا: «بۇل گارنيزون وتە ماڭىزدى، ويتكەنى ول قارسىلاسىمىزعا توسقاۋىل قويادى»، – دەدى.

ءساۋىردىڭ سوڭىندا پولشا قورعانىس ءمينيسترى پەنتاگون باسشىسىمەن كەلىسسوز جۇرگىزگەن. فوتو: VOA NEWS.

پولشاداعى جاڭالىقتار سايتىنىڭ بىرىندە، ۆارشاۆا بيلىگى اقش-تىڭ اسكەري بازانى قۇرۋ ىسىنە 2 ملرد اقش دوللارى كولەمىندە كومەك كورسەتەتىنىن دە حابارلاعان. سول ەلدىڭ قورعانىس مينيسترلىگى بۇل تۋرالى اقش كونگرەسى مەن پارتيا جەتەكشىلەرىنە ەگجەي-تەگجەيلى تۇسىندىرگەن.

پولياك قورعانىس مينيسترلىگىنىڭ ءباسپاسوز قىزمەتى Associated Press اگەنتتىگىنە بەرگەن جاۋابىندا اتالعان قۇجاتتى راستادى، بىراق مالىمەتتەردى بەرۋدەن باس تارتقان.

اقش-تىڭ ناتوداعى كۇشتەرى شىعىس ەۋروپاعا قاراي كەڭەيدى. فوتو: VOا.

رەسەي پرەزيدەنتىنىڭ ءباسپاسوز حاتشىسى پەسكوۆ بۇل تۋرالى: «باتىس ەلدەرىنىڭ رەسەي شەكاراسىنا جاقىن اسكەري وبەكتىلەردى قوسۋ ەۋروپا كونتينەنتىنىڭ قاۋىپسىزدىگى مەن تۇراقتىلىعىن ارتتىرمايدى»، – دەگەن پىكىرىن ءبىلدىردى.

تاسس اگەنتتىگى پەسكوۆتىڭ سوزىنە سىلتەمە بەرە وتىرىپ: «كەرىسىنشە بۇل اسكەري كەڭەيتۋ ارەكەتتەرى مىندەتتى تۇردە رەسەيدىڭ قارسى ارەكەتتەرىن تۋدىرادى. اسكەري تەپە-تەڭدىك بۇزىلعان سايىن جاڭا تەڭگەرىمگە ۇمتىلۋ پايدا بولادى دا، بۇل تۇراقسىزدىققا سوعادى»، – دەدى.

"“The Qazaq Times”