ترامپ تەلەفوندا. فوتو: Business Insider.

كەشەگى اقش پرەزيدەنتى مەن فيليپپين پرەزيدەنتى اراسىنداعى تەلەفوندا سويلەسۋ ەستەلىگى جاريالانىپ، اقش-تىڭ ماڭىزدى اسكەري قۇپيالىعى اشكەرەلەندى دەگەن اقپارات بۇگىن دە الەمدىك باقتى دۇربەلەڭگە سالىپ وتىر. اقش-تىڭ جات تۇگىلى جاقىنىنا بەرگىسىز قۇپيا مالىمەتتى پرەزيدەنت ترامپ شاي ۇستىندەگى اڭگىمەدەي ايتىپ سالعان. بۇل امەريكالىق باق-تى اشۋلاندىرىپ، شەتەلدىك باق-تى تاڭقالدىردى.

رەسەي «سپۋتنيكتىك» سايتىنىڭ ايتۋىنشا، اقش-تىڭ يادرولىق سۋاستى وپەراتسيالارى اسا قۇپيا بولىپ تابىلادى. ايتالىق، كەمە كاپيتانى مەن ەكيپاج مۇشەلەرىن، سونداي-اق، كەمەنىڭ ورىنىن ءبىلۋ وتە قيىن. امەريكا تەڭىز اسكەري فلوتىندا دا، ءتىپتى، پەنتاگون مەن اقۇي ىشىندە  كەمە تۋرالى اقپارات قۇپيا ساقتالادى. ترامپتىڭ ءسوز ەتىپ وتىرعانى يادرولىق قوزعالتقىشتى الدە يادرولىق قارۋمەن جابدىقتالعان سۋ استى كەمەسى بولسا دا، بۇل ءبىر اسا ماڭىز اسكەري قۇپيالىقتىڭ سىرتقا شاشىلعانى بولىپ تابىلادى.

اقش «Business Insider» ۆەب-سايتى اسكەري ىستەر ساراپشى مامانى ستيۆەن شۆارتس بىلاي دەدى: «اقش-تىڭ الەمنىڭ جەر-جەرىندە قىزمەت اتقارىپ تۇرعان 45 سۋ استى كەمەسى بار. ونىڭ ءبارى قۋاتتى يادرولىق قارۋدى قوزعالتۋدىڭ بۇيرىعىن كۇتىپ جۇرەدى. الەمدە ەشبىر ادام اقش سۋ استى كەمەلەرى تۋرالى مالىمەتتى الا المايدى. سەبەبى، ولاردى پايدالانۋ اسا سيرەك ءارى قۇپيا كۇيدە بولادى.

ترامپ جاقىندا عانا رەسەيگە قۇپيالىقتاردى اشىپ قويدى دەگەن ايىپتارعا ىلىگىپ قالىپ ەدى. بۇل رەسەي سىرتقى ىستەر ءمينيسترى اقش پرەزيدەنتتىنىڭ قىزمەت كەڭسەسىندە بولعان كەزدە شىققان اڭگىمە بولاتىن. اقش «ۋاشينگتون پوست» باسىلىمى باستاپ پرەزيدەنتىن قۇپيالىقتى شاشتى دەپ ايىپتادى. ايتالىق، اقش-تىڭ «يسلام مەملەكەتى» ۇيىمىنا قارسى كۇرەسىپ جۇرگەن اقپارشى اگەنتتەرىنىڭ باسىنا قاۋىپ تونگەلى تۇر دەگەن ەدى.

“The Qazaq Times”