فوتو: قر ءسىم ءباسپاسوز قىزمەتى

وتكەن اپتادا ەلىمىزدىڭ سىرتقى ىستەر مينيسترلىگى قىتايدىڭ سىرتقى ساياسي ۆەدومستۆوسىمەن كەلىسسوز جۇرگىزگەن. تاراپتار اراسىنداعى جيىن بەيجىڭ قالاسىندا ءوتىپتى. ماڭىزدى باسقوسۋدا ەكى جاق كونسۋلدىق سالاداعى ىنتىماقتاستىقتى، قوس ەل ازاماتتارىنىڭ قۇقىقتارى مەن مۇددەلەرىن قورعاۋ ماسەلەلەرىن تالقىلاعان. بۇل تۋرالى قر ءسىم ءباسپاسوز قىزمەتى حابارلادى.

قازاقستاننان بارعان دەلەگاتسيانى باسقارعان كونسۋلدىق قىزمەت دەپارتامەنتىنىڭ ديرەكتورى ارداق ماديەۆ قىتايلىق ارىپتەسىنەن قوس ازاماتتىق ءۇشىن قولعا تۇسكەن ەتنيكالىق قازاقتاردى بوساتۋدى سۇراپتى. ءوز كەزەگىندە قىتايلىق تاراپ بۇل ماسەلەنى شەشۋدىڭ ورتاق امالىن ويلاستىرۋعا ۋادە بەرگەن. ودان بولەك، قوس مەملەكەتتىڭ ديپلوماتتارى ەلدەر اراسىنداعى ۆيزالىق رەجيمدى جەڭىلدەتۋ ماسەلەسىن دە قاۋزاعان كورىنەدى. ولار ەكى ەلدىڭ حالىقارالىق اۋەجايلارىندا قازاقستان جانە قىتاي ازاماتتارىنىڭ كەلىپ-كەتۋ جانە ترانزيتپەن ءوتۋ ءتارتىبى تۋرالى اقپارات الماسقان.

وسىعان دەيىن، قازاقستان پرەزيدەنتى نۇرسۇلتان نازارباەۆ ماۋسىم ايىنىڭ باسىندا قىتايعا ىسساپارمەن باراتىنىن حابارلاعانبىز. مەملەكەت باسشىسى ەتنيكالىق قازاقتاردىڭ جايىن وسى ساپارى كەزىندە تىلگە تيەك ەتەدى دەگەن ءۇمىت باسىم.

“The Qazaq Times”