اقش ۆيتسە پرەزيدەنتىنىڭ پىكىرى سولتۇستىك كورەيانىڭ اشۋىن كەلتىردى. فوتو: Newsgw.

اقش پەن سولتۇستىك كورەيا ديپلوماتياسىنىڭ «كليماتى» تاعى بۇزىلدى. سولتۇستىك كورەيانىڭ ءسىم باسشىسىنىڭ ورىنباسارى چيو سون حۋ اقش-قا قارسى مالىمدەمە جاساپ، ماۋسىمداعى كەلىسسوزدىڭ تاعدىرى ۋاشينگتوننىڭ قولىندا تۇرعانىن، بۇل ماسەلەنى كەلىسسوزبەن دە، «يادرولىق قاقتىعىسپەن» دە شەشۋگە بولادى دەگەن كوزقاراسىن ءبىلدىردى. سونىمەن بىرگە، سولتۇستىك كورەيانى ليۆياعا تەڭەگەن اقش ۆيتسە پرەزيدەنتى مايك پەنستى دە سوزىنە ىلە كەتىپ، وعان «ساياسي قۋىرشاق» دەگەن ات قويدى.

سولتۇستىك كورەيانىڭ بۇلاي «قاتتى كەتۋىنىڭ» دە وزىندىك ورىندى جاقتارى جوق ەمەس. سەبەبى، بىرەر كۇن بۇرىن اقش-تىڭ ۆيتسە-پرەزيدەنتى مايك پەنس Fox News ارناسىنا بەرگەن سۇحباتىندا سولتۇستىك كورەيانىڭ وزەكتى قۇرالىنان باس تارتۋىن كەزىندەگى ليۆياداعى جاعدايعا ۇقساتتى. تەك مايك پەنس قانا ەمەس، ترامپتىڭ ۇلتتىق قاۋىپسىزدىك جونىندەگى كەڭەسشىسى جون بولتون دا وسىعان ۇقساس ءسوزدى باق وكىلدەرىنە ايتىپ ەدى.

ترامپتىڭ بۇل ەكى لاۋازىمدىسى، ليۆيانىڭ بۇرىنعى ليدەرى مۋاممار كاددافيدىڭ سانكتسيالاردى توقتاتۋ ءۇشىن يادرولىق باعدارلاماسىنان باس تارتاتىنىن بىلدىرگەنىن، 8 جىلدان كەيىن ەلدەگى باتىستى جاقتاۋشى كوتەرىلىسشىلەر تارابىنان ولتىرىلگەنىن ءسوز ەتتى. ءتىپتى، جون بولتون سوزىندە: «سولتۇستىك كورەيانىڭ يادرولىق قارۋدى جويۋ ءىسى «ليۆيا ستسەناريىمەن» ءجۇرۋى كەرەك»، – دەدى.

"VOA NEWS" حابارىنا قاراعاندا، بۇل سوزدەر سولتۇستىك كورەيانىڭ شامىنا ءتيىپ، اقش-پەن اراداعى كەزەكتى «قايىم ايتىستى» باستاپ كەتتى. اقش تارابى دا الداعى كەلىسسوزدەر ءۇشىن بولسا دا جول بەرە سالۋعا «نامىسى جىبەرمەي» تۇرعانداي. مايك پەنس بىرەر كۇن بۇرىنعى مالىمدەمەسىندە: «ەگەر سولتۇستىك كورەيا يادرولىق قارۋلارىن جوعالتپاسا، ليۆياداعى جاعداي سولتۇستىك كورەيادا دا تۋىلادى»، – دەدى. بۇعان كيم جوڭ ۋننىڭ (كيم چەن ىن/Kim Jong Un) ەڭ سەنىمدى ادامدارىنىڭ ءبىرى چيو سون حۋ: «بۇل ماسەلە يادرولىق قاقتىعىسپەن دە شەشىلىپ قالۋى مۇمكىن»، – دەدى.

دەگەنمەن، Yonhap اگەنتتىگىنىڭ حابارىندا، سولتۇستىك كورەيا ءوزىنىڭ يادرولىق پوليگونىن جابۋدى باستاپ كەتكەن. وعان بىرنەشە ەلدىڭ جۋرناليستەرى باقىلاۋشى بولىپ قاتىستى. سولتۇستىك كورەيا ۇكىمەتى جاساعان مالىمدەمەدە، ەگەر اۋا-رايىنىڭ قولايسىزدىعى بولماسا جۇما كۇنگە دەيىن يادرولىق سىناق الاڭىن تولىقتاي قيراتىپ تاستاماق.

“The Qazaq Times”