فوتو: eGov.kz

قازاقستاندىقتار وزدەرىنىڭ جەكە دەرەكتەرىن بۇعاتتاۋعا قۇقىلى. بۇل تۋرالى «ازاماتتارعا ارنالعان ۇكىمەت» مەملەكەتتىك كورپوراتسيا» كەاق توراعاسى ابىلايحان وسپانوۆ مالىمدەدى، دەپ حابارلايدى Tengrinews.kz سايتىنىڭ ءتىلشىسى.

«جەكە دەرەكتەر مەن مالىمەتتەردى رۇقساتسىز پايدالانۋ قاۋپىن جويۋ ماقساتىندا، ءبىز ازاماتتاردىڭ وزدەرىنىڭ جەكە دەرەكتەرىن باقىلاۋ مۇمكىندىكتەرىنە قاتىستى جوبا جاسادىق. باسقاشا ايتقاندا، حقكو ماماندارى ازاماتتاردىڭ جەكە باستارىنا قاتىستى دەرەكتەردى تەك ولاردىڭ كەلىسىمدەرىمەن عانا الا الادى. بۇل قىسقا حابارلاما ارقىلى اتقارىلادى»، دەدى ا.وسپانوۆ، ورتالىق كوممۋنيكاتسيالار قىزمەتىنىڭ بريفينگىندە.

«ازاماتتارعا ارنالعان ۇكىمەت» مەملەكەتتىك كورپوراتسياسىنىڭ ءباسپاسوز قىزمەتىنىڭ مالىمەتىنشە، اتالعان جوبا ەكى كەزەڭ ارقىلى جۇزەگە اسىرىلادى. ءبىرىنشى كەزەڭدە «ەلەكتروندى ۇكىمەت» (eGov.kz) پورتالى پايدالانۋشىلارىنىڭ جەكە كابينەتىندە اپتا سوڭىنا دەيىن دەرەكتەردى بۇعاتتاۋ فۋنكتسياسى پايدا بولادى. پورتالدىڭ ءاربىر پايدالانۋشىسى ونى ىسكە قوسىپ جانە وزدەرىنىڭ جەكە دەرەكتەرىن بۇعاتتاي الادى. سونىمەن قاتار، قىزمەت پايدالانۋشىلار جەكە دەرەكتەرىن تەك جەكە كابينەتتەرى ارقىلى بۇعاتتان شىعارا الادى. ەكىنشى كەزەڭ — جەكە دەرەكتەرىن «SMS-قىزمەت» ارقىلى بۇعاتتان شىعارۋ تۇرىندە جۇزەگە اسىرىلماق. ياعني، ەگەر پورتال قولدانۋشىسى جەكە دەرەكتەرىن بۇعاتتاعان جاعدايدا، حقكو قىزمەتكەرى جۇيەگە سول ازاماتتىڭ جسن ءنومىرىن ەنگىزگەننەن كەيىن ۇسىنىستار كورسەتىلگەن حابارلاما الادى. بۇل ءادىس تەك قىزمەت پايدالانۋشى تاراپىنان SMS-پەن راستالعاندا عانا، حقكو مامانى ودان كەيىنگى قىزمەتتەردى كورسەتۋ ءۇشىن دەرەكتەرگە قول جەتكىزە الادى. «وسى قىزمەتتى پايدالانۋ ءۇشىن ازاماتتاردىڭ ءموبيلدى بازاسىنا تىركەلۋ كەرەك. بۇنى «ەلەكتروندى ۇكىمەت» پورتالىنداعى جەكە كابينەتتەرىندە نەمەسە كەز كەلگەن حقكو-دا جاساۋعا بولادى»، دەپ حابارلايدى «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ ءباسپاسوز قىزمەتى.

“The Qazaq Times”