بىرىككەن اراب امىرلىگىندە بىرنەشە وتانداسىمىز استان ۋلاندى. ولار تانىمال قوناق ۇيدە تاڭعى استارىن ءىشىپ، ىزىنشە دارىگەرلەردىڭ كومەگىنە جاپپاي جۇگىنگەن. ءتىپتى، ينفەكتسيا جۇقتىرعانداردىڭ اراسىندا بالالار دا بار ەكەن. قازىر استان ۋلانعان بىرنەشە قازاقستاندىق وتباسى ەلگە قايتىپ ۇلگەردى. ولاردىڭ كوبى استانا جانە الماتى قالالارىنداعى اۋرۋحانالاردا جاتىر.

فوتو: tengrinews.kz

The Qazaq Times ءتىلشىسى اراب ەلىنە ساياحاتتاۋعا بارىپ، قاپىدا جۇقپالى دەرتكە شالدىققان ناۋقاستاردىڭ بىرىمەن تەلەفون ارقىلى سويلەستى. اسەل جاراسقاليقىزى ەسىمدى تۇرعىن بولعان جايتتى ەگجەي-تەگجەيلى بايانداپ بەردى. ايتۋىنشا، قوناق ۇيدە ۇزىن-ىرعاسى 200-گە جۋىق تۋريست تاماقتان ۋلانعان ەكەن. ولاردىڭ 50-گە جەتەعابىلى ءبىزدىڭ ەلدەن ساياحاتتاپ بارعاندار. قالعانى رەسەي، ۋكراينا جانە بەلارۋس ەلىنىڭ تۋريستەرى. ۋلانۋ دەرەگى تىركەلگەن سوڭ، جەرگىلىكتى دارىگەرلەر ناۋقاستاردىڭ بارلىعىنا العاشقى كومەك كورسەتكەن. كەيىن، تۋريستىك كومپانيالار وتانداستارىمىزدىڭ ەلگە قايتۋىنا سەپتەسىپتى. بىزگە بەلگىلىسى - قازىر ون شاقتى وتباسى قازاقستانعا ورالىپ ۇلگەرگەن. ولاردىڭ ءبىرى الماتىداعى اۋرۋحانادا جاتىر. مۇنداعى دارىگەرلەر استان ۋلانعان الگى ناۋقاسقا سالمونەللەز دياگنوزىن قويىپتى-مىس. قالعاندارىنىڭ قانداي دەرتكە شالدىققانى ازىرگە انىقتالمادى.

فوتو: tengrinews.kz

تاماقتان ۋلانىپ، جاعدايى كۇرت ناشارلاعانداردىڭ اراسىندا اسەل جاراسقاليقىزىنىڭ وتباسى دا بار. اسىرەسە، 1 جاستان اسقان بالاسىنىڭ جاعدايى تىم اۋىر. باۋىرىنا زاقىم كەلگەن ءبۇلدىرشىن استاناداعى جۇقپالى اۋرۋلار اۋرۋحاناسىنىڭ جان ساقتاۋ بولىمىندە جاتىر ەكەن.

وسى تۇستا، جۇقپالى دەرتكە شالدىققان وتانداستارىمىز تۋريستىك كومپانيالار مەن ساقتاندىرۋ مەكەمەلەرىنەن ساياحاتقا كەتكەن شىعىندارىن وتەپ الاتىندارىن مالىمدەدى.

“The Qazaq Times”