فرانتسۋزداردى پىشاقتاعان سودىر پوليتسيا باقىلاۋىندا بولعان

پاريج ورتالىعىندا قاندى قىرعىن ۇيىمداستىرعان لاڭكەس ءبىر ادامدى پىشاقتاپ، 4 تۇرعىندى جارالاپ ۇلگەرگەن. 21 جاستاعى قاندىقول شەشەنستان تۋماسى. فرانتسيا ازاماتتىعىن 2010 جىلى العان ەكەن. 2016 جىلدان بەرى راديكالدى يسلامشىلدار جاقتاسى رەتىندە پوليتسيانىڭ باقىلاۋىندا بولىپتى. بۇل تۋرالى France Info باسىلىمى حابارلادى.  

شابۋىل پاريجدىك وپەرا عيماراتىنا جاقىن ماڭدا - فرانتسيا استاناسىنىڭ تۋريستەر كوپ جۇرەتىن اۋدانىندا تىركەلگەن. سۋىق قارۋ اسىنعان جىگىتتى پوليتسيا اتىپ ءولتىردى. وسى وقيعادان كەيىن، شەشەنستان باسشىسى رامزان قادىروۆ ءوزىنىڭ Telegram-ارناسى ارقىلى ازيموۆتىڭ رەسپۋبليكادا دۇنيەگە كەلگەنىن، وندا 14 جىل تۇرعانىن راستادى. قادىروۆ جاس بالانىڭ راديكال اعىمنىڭ جەتەگىندە كەتۋىنە فرانتسيا جاۋاپتى دەپ ەسەپتەيدى.

“The Qazaq Times”